Муовини раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ ҳайати сенаторони Гурӯҳи дӯстии Сенати Ҷумҳурии Фаронса оид ба ҳамкорӣ бо кишварҳои Осиёи Марказиро таҳти роҳбарии Эрве Море ба ҳузур пазируфт.

Тавре ки маркази матбуоти Маҷлиси намояндагони Маҷлиси Олии Ҷумҳурии Тоҷикистон хабар медиҳад, зимни мулоқот ҷонибҳо рушди ҳамкориҳои байнипарлумониро яке аз абзорҳои калидии таҳкими эътимод ва густариши муколамаи сиёсӣ дониста, ба фаъолияти гурӯҳҳои дӯстии байнипарлумонӣ аҳамияти махсус доданд.

Иттилоъ дода мешавад, ки масъалаи густариши ҳамкорӣ дар самтҳои табодули таҷрибаи қонунгузорӣ, рушди устувор, ҳифзи муҳити зист, рақамикунонӣ ва таҳкими институтҳои демократӣ мавриди баррасӣ қарор гирифтанд.

“Дар ҷараёни мулоқот масъалаи афзоиши ҳаҷми мубодилаи тиҷоратӣ миёни ду кишвар низ мавриди баррасии амиқ қарор гирифт. Қайд гардид, ки Ҷумҳурии Тоҷикистон дар доираи сиёсати дарҳои кушод барои ҷалби сармояи хориҷӣ заминаҳои мусоиди ҳуқуқӣ ва иқтисодиро фароҳам овардааст. Дар ин замина, ҷонибҳо ба тавсеаи ҳамкориҳои иқтисодӣ дар соҳаҳои афзалиятнок, аз ҷумла саноат, энергетика, рушди инфрасохтор, металлургия ва тандурустӣ таваҷҷуҳи хоса зоҳир намуданд”, - зикр мекунад манбаъ.

Ҳамзамон, масъалаҳои густариши ҳамкориҳо дар соҳаҳои амният, фарҳанг ва илму маориф баррасӣ шуда, ҷонибҳо омодагии худро барои идомаи муколамаи созанда ва баргузории мулоқоти навбатӣ дар шаҳри Париж дар доираи сафари ҳайати парлумонии Тоҷикистон иброз намуданд.

Dialog.tj