Созмони байналмилалии паноҳҷӯён дар гузорише эълон кардааст, ки занони паноҳҷӯи афғон дар Эрон дар миёни шиддат гирифтани ҷанг ва хатари бозгашт ба Афғонистон таҳти идораи гурӯҳи террористии Толибон амалан “ҷое барои рафтан надоранд”.

Ин ниҳод рӯзи душанбе, 16-уми март гуфтааст, бисёре аз ин занон, ки аз маҳдудиятҳои Толибон гурехтаанд, ҳоло дар Эрон бо хатари ҷанг, табъиз, эҳтимоли боздошт ё ихроҷ ва набудани кумакҳои башардӯстона рӯ ба рӯ ҳастанд.

Дар гузориш ҳамчунин, омадааст, ки баъзе занон ҳатто барои гурехтан аз вазъияти душвор кӯшиш кардаанд аз роҳҳои ғайриқонунӣ ба кишварҳои дигар раванд, аммо бо хатарҳои ҷиддӣ, аз ҷумла сӯиистифодаи қочоқчиён рӯ ба рӯ шудаанд.

Созмони байналмилалии паноҳҷӯён аз ҷомеаи ҷаҳонӣ хостааст, ки аз бозгардонидани иҷбории паноҳҷӯёни афғон дар шароити хатарнок пешгирӣ кунанд ва роҳҳои амн барои интиқоли онҳо ба кишварҳои мизбон фароҳам намоянд.

Ин ниҳод ҳушдор додааст, ки агар таваҷҷуҳ ба вазъи паноҳҷӯёни афғон, ба вижа занон ва духтарон, зиёд нашавад, хатари густариши сӯиистифода, қочоқ ва хушунатҳои ҷинсӣ бештар хоҳад шуд.

Dialog.tj