Забеҳуллоҳ Муҷоҳид, сухангӯйи гурӯҳи террористии Толибон, эълон кардааст, ки артиши Покистон бори дигар ба ҳудуди Афғонистон “таҷовуз” карда, як шифохонаи дармони нашъамандонро дар Кобул ҳадаф қарор додааст.

Муҷоҳид шоми душанбе, 16-уми март бо нашри як хабарнома гуфтааст, дар натиҷаи ин ҳамла шуморе аз ғайринизомиён, ки бештари онҳо нашъамандоне буданд, ки таҳти табобат қарор доштанд, кушта ва захмӣ шудаанд.

Ӯ ин ҳамларо “ҷиноят” хонда, онро башиддат маҳкум кардааст.

Сухангӯи Толибон афзудааст: “Мо ин ҷиноятро бо шадидтарин ибораҳо маҳкум мекунем ва чунин амалро мухолифи тамоми усулҳои пазируфташуда ва як иқдоми зиддибашарӣ медонем”.

Ин дар ҳолест, ки пештар сокинони Кобул аз рух додани чандин инфиҷор дар бахшҳои гуногуни ин шаҳр хабар дода буданд.

Dialog.tj