Созмони Милали Муттаҳид дар пайи даргирӣ миёни Толибон ва Покистон бори дигар хостори ҳифозат аз ғайринизомиён шудааст.

Ин созмон рӯзи чоршанбе, 4-уми март дар баёнияе гуфтааст, ки ба далели дастрасӣ надоштан ба иттилоот, ҳанӯз наметавонад омори дақиқи талафотро мунташир кунад.

Бар асоси баёния, шуморе аз хонаводаҳо дар шимолу ғарби Афғонистон маҷбур ба тарки хонаҳои худ шудаанд.

Созмони Милал афзудааст, ки амалиёти имдодрасонӣ дар бархе мантақаҳои Хайбар Пахтунхво ба таври муваққат мутаваққиф шудааст, ҳарчанд кумакҳо дар ҷануби ин иёлат идома дорад.

Ин созмон таъкид кардааст, ки ҳамлаҳои ҳавоии Покистон сабаби талафот ва тахриби хонаҳо шудааст.

Созмони Милал тасреҳ кардааст, ки панҷ тан, аз ҷумла кӯдакон дар наздикии гузаргоҳи Турхам ва ду тани дигар дар вулусволии Нозиёни Нангарҳор захмӣ шудаанд.

Стефан Дюжаррик, сухангӯи Дабири кулли Созмони Милал гуфтааст:

“Ғайринизомиён бояд дар ҳама замонҳо ва ҳамчунин, зерсохтҳои ғайринизомӣ муҳофизат шаванд”.

Пеш аз ин, Созмони байналмилалии муҳоҷират ҳушдор дода буд, ки даргирӣ миёни ду тараф раванди бозгашти муҳоҷиронро бадтар кардааст.

Dialog.tj