Вазорати дифои гурӯҳи террористии Толибон таъйид кардааст, ки 28 ҷангҷӯи ин гурӯҳ дар таниши низомӣ бо Покистон кушта шудаанд.

Иноятуллоҳ Хоразмӣ, сухангӯи Вазорати дифои Толибон, рӯзи сешанбе, 3-юми март дар як нишасти хабарӣ афзудааст, ки наздики 40 ҷангҷӯи дигар захмӣ шудаанд.

Ӯ ҳамчунин, иддао кардааст, ки аз оғози даргириҳо то кунун беш аз 130 низомии покистонӣ кушта ва ҳудуди 200 тани дигар захмӣ шудаанд.

Ба гуфтаи ӯ, наздики 40 постгоҳи низомии Покистон ба дасти Толибон афтодааст.

Ин дар ҳолест, ки Покистон иддао дорад дар ҷараёни даргириҳо ҳудуди 430 ҷангҷӯи Толибонро куштааст.

Даргирии низомӣ миёни гурӯҳи террористии Толибон ва Покистон вориди шашумин рӯз шуда ва ҳамчунон идома дорад.

Бо ин ҳол, Покистон се субҳи пайдарпай мавқеъҳои низомии Толибонро дар Кобул бомбаборон кардааст ва садои инфиҷор ва тирпарронӣ шунида шудааст.

Ҳамзамон, дафтари Ҳайати муовинати Созмони Милал дар Афғонистон (ЮНАМА) шумори талафоти ғайринизомиёнро 42 нафар эълом кардааст.

Dialog.tj