Эммануел Макрон, президенти Фаронса истеъфои раиси Осорхонаи Луврро дар пайи дуздии бузурги ҷавоҳирот ва афзоиши интиқодҳо аз мудирияти ин ниҳоди фарҳангӣ пазируфтааст.

Дафтари раёсати ҷумҳури Фаронса шаби сешанбе, 24 –уми феврал эълом кард, ки Лоранс Декар истеъфои худро ба Макрон пешниҳод кардааст ва ин истеъфо мавриди қабул қарор гирифтааст.

Дар баёнияи раёсати ҷумҳурӣ омадааст, ки Макрон ин иқдомро “ҳаракати масъулона дар замоне, ки бузургтарин осорхонаи ҷаҳон ба оромиш ва неруи тоза барои пешбурди лоиҳаҳои муҳимми амниятӣ ва навсозӣ ниёз дорад” тавсиф кардааст.

Дуздии ҷавоҳироте ба арзиши ҳудуди 102 миллион доллар дар моҳи октябр, ки то кунун бозёфт нашудаанд, мавҷи интиқодҳоро нисбат ба вазъияти амниятии Лувр барангехт ва холигиҳои ҷиддӣ дар низомҳои муҳофизатии онро ошкор сохт.

Ҳамзамон, эътирозҳои кормандон аз моҳи декабр бар сари маош ва шароити корӣ боиси баста шудани такрории Осорхона шуда ва бар мушкилоти мудириятии он афзудааст.

Dialog.tj