Вазорати корҳои хориҷаи Русия дар гузорише дар бораи вазъияти низомӣ-сиёсии Афғонистон гуфтааст, ки авзои ин кишвар ҳамчунон печида ва душвор аст ва фаъолияти шабакаҳои террористӣ аслитарин омили бесуботӣ маҳсуб мешавад.

Сомонаи Вазорати корҳои хориҷаи Русия рӯзи душанбе, 23-уми феврал бо нашри гузорише гуфта, бар асоси баррасиҳои расмӣ теъдоди кулли ҷангҷӯёни гурӯҳҳои террористии байналмилалӣ дар хоки Афғонистон байни 20 то 23 ҳазор тан аст, ки аксари онҳо хориҷӣ ҳастанд.

Ин гурӯҳҳо шомили “Шохаи Хуросони Давлати Исломӣ” бо ҳудуди се ҳазор тан, “Таҳрики Толибони Покистон” бо панҷ то ҳафт ҳазор тан, “Ал-Қоида” бо 400 то 1500 тан, “Ҷунбиши исломии Туркистони Шарқӣ” бо 300 то 1200 тан, “Ҷунбиши исломии Ӯзбекистон” (ки ба “Ҳизби исломии Туркистон” тағйири ном додааст) бо 150 то 500 тан ва “Ҷамоати Ансоруллоҳ” бо 150 то 250 тан ҳастанд.

Дар гузориш омадааст, ки танҳо гурӯҳи террористии фаъол алайҳи Толибон, шохаи ДОИШ - “Вилояти Хуросон” аст, ки урдугоҳҳо ва пойгоҳҳое дар шарқ ва шимолу шарқи Афғонистон дорад ва қасди нуфуз ба Осиёи Марказӣ барои эҷоди “Хилофати исломи”-ро дорад.

Дар гузориш таъкид шудааст, ки авзои низомӣ–сиёсии Афғонистон ҳамчунон осебпазир аст ва ҳифзи суботи ин кишвар ниёзманди таваҷҷуҳи байналмилалӣ ба паёмадҳои иқтисодӣ ва иҷтимоӣ барои мардум мебошад.

Dialog.tj