Теъдоде аз қонунгузорони амрикоӣ бо интишори паёмҳо дар шабакаҳои иҷтимоӣ, ба мухолифат бо сиёсатҳои ҷангталабонаи Доналд Трамп, президенти Амрико алайҳи Эрон пардохтанд ва аз паёмадҳои дохилии моҷароҷӯйиҳои вай башиддат изҳори нигаронӣ карданд.

Дон Байер, намояндаи демократ аз иёлати Вирҷиния дар Маҷлиси намояндагони Амрико бо интишори матне дар шабакаи иҷтимоии “Х” навишт: “Трамп таҳдид мекунад, ки Амрико ба ҷанг бо Эрон хоҳад рафт, магар ин ки онҳо музокирае монанди тавофуқе, ки ӯ дар соли 2018 пора кард, имзо кунанд, то барномаи ҳастаии худро, ки чанд моҳ пеш иддао мекард комилан ва тамоман нобуд кардааст, раҳо созанд”.

Ҷим Макговерн, намояндаи демократ аз иёлати Массачусетс дар Маҷлиси намояндагони Амрико дар матни интиқодӣ чунин навишт: “Амрикоиҳо ҷанг бо Эронро намехоҳанд. Мо хостори нархҳои арзонтар, нигоҳдории беҳтари тандурустӣ, ҷойҳои кори бештар ва манзили қобили пардохт ҳастем. Мо раҳбароне мехоҳем, ки тарафи мо бошанд - на табақаи миллиардерҳои Эпштейн!”

Прамила Ҷаяпал, намояндаи демократ аз иёлати Вашингтон дар Маҷлиси намояндагони Амрико дар вокуниш ба гузориши “Ню-Йорк Таймс” дар бораи таҳаррукоти низомии Амрико барои ҷанг бо Эрон навишт: “На бидуни иҷоза аз Конгресс. Мардуми Амрико ҷанги дигар намехоҳанд”.

Энди Ким, сенатори демократ аз иёлати Ню-Ҷерсӣ дар Сенати Амрико дар “Х” навишт: “Ҷанг бо Эрон чӣ чизе барои шумо ба армуғон меоварад? Оё шуморо амнтар мекунад? Оё пардохти қабзҳоятонро осонтар мекунад? Оё шуморо нисбат ба ояндаатон хушбинтар мекунад? Трамп кишвари моро бидуни далел, бидуни барнома ва бидуни таваҷҷуҳ ба шумо ба остонаи ҷанг мекашонад”.

Грег Касар, намояндаи Конгресси Амрико дар саҳифаи худ дар шабакаи иҷтимоии “Х” навишт: “Мардуми Амрико намехоҳанд бо Эрон вориди ҷанг шаванд”.

Dialog.tj