Тавре ки АМИТ «Ховар» хабар медиҳад, 18-уми феврал ба 67 ҷоизадори мусобиқаҳои сатҳи байналмилалӣ Ҷоизаи Президенти Ҷумҳурии Тоҷикистон дар ҳаҷми 2 миллиону 40 ҳазор сомонӣ тақдим карда шуд.

Гуфта мешавад, ки ҳамасола ғолибон ва ҷоизадорони мусобиқаҳои сатҳи байналмилалалии варзишӣ бо Ҷоизаи Президенти Ҷумҳурии Тоҷикистон ҳавасманд карда мешаванд.

Манбаъ меафзояд, ки дар маросими ҷоизасупории соҳаи тарбияи ҷисмонӣ ва варзиш ғолибони озмунҳои «Варзишгари беҳтарини сол», «Мураббии беҳтарини сол», «Мактаби варзишии беҳтарини сол», «Беҳтарин федератсияи варзишии сол», «Беҳтарин иншооти варзишии сол», «Беҳтарин шаҳри варзишии сол», «Беҳтарин воситаи ахбори омма дар соҳаи тарбияи ҷисмонӣ ва варзиш», «Беҳтарин сохтори маҳаллӣ дар соҳаи тарбияи ҷисмонӣ ва варзиш», «Шореҳи беҳтарини соҳаи варзиш» ва «Варзишгар-навраси умедбахш» қадрдонӣ шуданд.

Иттилоъ дода мешавад, ки давоми соли гузашта варзишгарони тоҷик аз мусобиқаҳои сатҳи байналмилалӣ ба хазинаи варзишии мамлакат 510 медал, аз ҷумла 140 медали тилло, 166 нуқра ва 204 медали биринҷӣ ворид намуданд.

Dialog.tj