18-уми феврали соли 2026 Президенти Ҷумҳурии Тоҷикистон муҳтарам Эмомалӣ Раҳмон ба муносибати фарорасии моҳи шарифи Рамазон ба мардуми кишвар паёми шодбошӣ ирсол намуданд.

Пешвои миллат Рамазонро моҳи файзу баракат, хайру саховат ва сабру таҳаммул арзёбӣ карда, барои ҳар хонадони кишвар саодату осоиш ва муваффақият орзу намуданд. Дар паём таъкид гардид, ки ҳикмати рӯза танҳо худдорӣ аз хӯрдану ошомидан нест, балки покизагии ботин, дурӣ аз кинаву адоват ва анҷоми амалҳои неку шоиста дар ҷомеа аҳаммияти аввалиндараҷа доранд: “Парҳезгорӣ, саховатмандӣ ба атрофиён, дасти ниёзмандонро гирифтан, аз рӯйи тавону имкон кумак кардан ба наздикони худ ва анҷом додани дигар амалҳои неку савоб аз ҷумлаи арзишҳое мебошанд, ки дар ин моҳ барои мусулмонон савоби бештар доранд”.

Президенти кишвар аз шаҳрвандон даъват ба амал оварданд, ки дар моҳи муборак ба ятимону маъюбон ва ниёзмандон дасти ёрӣ дароз намуда, аз исрофкорӣ ва зоҳирпарастӣ худдорӣ кунанд. Ҳамчунин, ба масъалаи риояи инсоф дар хариду фурӯш ва роҳ надодан ба болоравии сунъии нархҳо таваҷҷуҳи махсус зоҳир карда шуд: “Хусусан, риояи инсоф дар хариду фурӯши молу маҳсулот, худдорӣ кардан аз оростани дастархони серхарҷ ва истеъмоли аз меъёр зиёди хӯроки серғизо дар ин моҳ бисёр муҳим аст, зеро амалҳои зикршуда ба моҳияти ин моҳи муборак умуман созгор нестанд”.

Дар идомаи паём, бо ишора ба вазъи мураккаби ҷаҳони муосир, аз ҷумла таъсири тағйирёбии иқлим ва буҳронҳои иқтисодӣ, масъалаи таъмини амнияти озуқаворӣ муҳим арзёбӣ гардид. Сарвари давлат истифодаи самараноки замин, афзоиши истеҳсоли маҳсулоти кишоварзӣ ва коҳиши вобастагӣ аз воридотро вазифаи имониву инсонии ҳар як шаҳрванд донистанд.

Ҳамзамон, ба масъалаи таълиму тарбияи фарзандон, илмомӯзӣ ва касбу ҳунаромӯзии ҷавонон таваҷҷуҳи хосса зоҳир шуда, таъкид гардид, ки давлат дар ин самт тадбирҳои заруриро амалӣ менамояд, вале масъулияти асосӣ бар дӯши падару модарон низ мебошад.

Дар фарҷом, Президенти кишвар мардуми Тоҷикистонро ба муттаҳидиву сарҷамъӣ, ҳифзи сулҳу субот ва саҳмгузорӣ дар ободии Ватан даъват намуда, фарорасии моҳи шарифи Рамазонро бори дигар табрик гуфтанд.

Dialog.tj