Мувофиқи Амри Президенти Ҷумҳурии Тоҷикистон, 67 варзишгар аз рӯйи 8 намуди варзиш, аз ҷумла гӯштини ҷудо, гӯштини тарзи озод, гӯштини юнонӣ-румӣ, бокс, қаиқронӣ, таэквандо (ВТ), самбо ва кикбоксинг бо Ҷоизаи Президенти Ҷумҳурии Тоҷикистон сарфароз гардонда мешаванд.

Иттилоъ дода мешавад, ки маблағи умумии ҷоизаҳо ду миллиону чил ҳазор сомониро ташкил дода, барои як варзишгар вобаста ба натиҷаи варзишӣ то 150 ҳазор сомонӣ пешбинӣ гардидааст.

“Соҳаи варзиш ва варзишгарони касбӣ ҳамеша зери дастгирӣ ва қадршиносии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қарор дошта, заҳматҳо ва дастовардҳои онҳо дар мусобиқаҳои байналмилалӣ, ки воситаи муаррифии шоистаи миллату давлат дар арсаи ҷаҳонӣ мебошад, қадрдонӣ мешавад”, - зикр мекунад хадамоти матбуоти Президенти кишвар.

Ёдовар мешавем, ки Ҷоизаи Президенти Ҷумҳурии Тоҷикистон соли панҷум аст, ки ба ғолибон, ҷоизадорони мусобиқаҳои байналмилалии варзишӣ ва муррабиёни онҳо тақдим мегардад. Ҷоизаи мазкур нишонаи қадршиносии давлатии варзишгарони бонангу номуси кишвар, ки дар арсаи ҷаҳонӣ барои ҳифзи обрӯи миллат ва баланд бардоштани мақоми давлат заҳмат мекашанд, мебошад.

Dialog.tj