Ро Ханна, намояндаи Конгресси Амрико ва узви кумитаи таҳқиқи ин ниҳоди қонунгузор гуфт, агар мушаххас шавад, ки аъзои Қасри Бакингем дар “парвандаи Эпштейн” дохил будаанд, шояд ин поёни салтанат бошад.

Ба гузориши рӯзи сешанбеи “Скай Нюз” (Sky News), Ханна ба унвони узви Кумитаи таҳқиқи Конгресси Иёлоти Муттаҳида дар мавриди расвоии Эпштейн ба ин шабакаи хабарии англисӣ гуфт, ки шоҳ Чарлз ва малика Камила бояд ба пурсишҳое дар бораи Эндрю Маунтбаттен-Виндзор посух диҳанд.

Ин намояндаи демократии Конгресс, ки аз ҷумла аъзои ворид дар таҳқиқ дар бораи моҷарои расвоии Ҷеффри Эпштейн аст, гуфт: “Шояд ин поёни салтанат бошад”. Вай афзуд: “Ман фикр мекунам салтанати Бритониё ҳаргиз то ба ин андоза осебпазир набудааст”.

Ханна ҳамчунин, аз ҷумлаи намояндагоне аст, ки ҳомии шаффофсозӣ дар бораи парвандаҳои Эпштейн ва қонуне аст, ки дар ниҳоят мунҷар ба интишори он шуд.

Вай дар гуфтугӯ бо “Скай Нюз” дар хусуси посухгӯии шоҳ ва маликаи Бритониё хотирнишон кард: “Агар онҳо посухе надошта бошанд, агар дар парвандаи Эпштейн даргир бошанд, чеҳраи хубе барои салтанати Бритониё нест. Подшоҳ бояд ба ончи дар бораи Эндрю медонист, посух диҳад ва фақат бозпасгирии унвон аз Эндрю кофӣ нест”.

Узви Конгресси Амрико идома дод: “Эндрю бояд дар кумитаи мо ҳозир шавад ва ба саволҳо посух диҳад. Фикр мекунам муҷозоти муносиб ин нест, ки дигар шоҳзода набошӣ. Бояд чизе беш аз ин бошад. Онҳо бояд посух диҳанд. Ман расми бритониёиҳоро намефаҳмам, ки касе аз малика саволе бипурсад ва малика аз ин ки аз ӯ саволе пурсида мешавад, озурдахотир мешавад? Манзур ин аст ки, бас кунед. Ӯ ҳамон либосҳоро мепӯшад, ҳамон ғизоро мехӯрад, ӯ танҳо як инсон аст, ӯ бояд ба ҳамон саволҳо посух диҳад, ки ҳама мепурсанд”.

Ин расона ёдоварӣ мекунад, ки Эндрю Маунтбаттен-Виндзор то кунун иддаоҳои марбут ба дохил будан дар иттиҳомоти марбут ба ҷиноятҳои ҷинсӣ дар парвандаи Эпштейнро рад карда ва ҳеч нишонае ҳам вуҷуд надорад, ки хонаводаи салтанатӣ бо Эпштейн дар иртибот будаанд. Аммо бар асоси санадҳои мавҷуд, Эпштейн ба унвони як кӯдакозор ба Қасри Бакингем даъват шуда ва аз “амлоки Балморал” низ боздид кардааст. Аз Гайзлейн Максвелл, ҳамдасти Эпштейн ва қочоқчии ҷинсии маҳкум, низ дар Сандрингем ҳамроҳ бо Эндрю акс гирифта шудааст.

Жасмин Крокетт, дигар намояндаи Конгресс ва яке аз аъзои демократи Кумитаи таҳқиқ низ вазъияти пеши рӯ дар мавриди доахил будани аъзои Қасри Бакингем дар парвандаи Эпштейнро як “тори бисёр дарҳам танида” тавсиф кард ва гуфт: “Масъала ин аст, ки мо ба далелҳо нигоҳ мекунем ва саъй мекунем бибинем чӣ касе дар ин моҷаро дохил аст. Тори бисёр дарҳам танида аст”.

Вай афзуд: “Ба назари ман мо бояд бо ҳар касе суҳбат кунем, ҳатто агар ин ба маънои он бошад, ки то сатҳҳои боло пеш равем”.

Аз сӯи дигар, Қасри Бакингем дар баёнияе эълом кардааст, ки подшоҳи Бритониё “нигаронии амиқ”-и худро дар бораи иддаоҳои перомуни Эндрю иброз карда ва таъкид кардааст: “Агар пулиси Темз Вэлли (Thames Valley Police) бо мо тамос бигирад, ҳамон гуна ки интизор доред, омодаи ҳамкорӣ ва ҳимоят хоҳем буд”.

Ба гузориши расонаҳо, Шоҳи Англия дирӯз дар ҷараёни ҳузури умумӣ дар шаҳри Клитероу дар шимолу ғарби ин кишвар ва ҳангоми вуруд ба истгоҳи қатора, бо фарёди яке аз ҳозирон рӯбарӯ шуд, ки пурсид: “Аз чӣ замон дар бораи Эндрю медонистӣ?” Ин тайи чанд рӯзи ахир дувумин бор аст, ки дар як маросими умумӣ, пурсишҳое дар бораи нақши подшоҳ дар парвандаи бародараш аз миёни ҷамъият матраҳ мешавад. Ӯ чанде пеш низ дар ҷараёни як барномаи умумии дигар дар Эссекс бо эътирозоти мушобеҳ рӯбарӯ шуда буд.

Ин дар ҳолест, ки мавҷи тозаи ифшогариҳо дар бораи парвандаи Эпштейн, бори дигар пои хонадони салтанатиро ба садри хабарҳо кашонда ва пурсишҳо дар бораи абъоди иртиботи бародари подшоҳ бо ин сармоядори амрикоии муттаҳам ба ҷиноятҳои ҷинсиро ташдид кардааст. Меҳвари ин ифшогариҳо, интишори паёмҳо ва аснодест, ки ба иртибототи Эндрю бо Эпштейн дар давраи фаъолияти расмии ӯ ба унвони намояндаи вижаи тиҷории Англис бозмегардад.

Dialog.tj