Истеҳсоли энергияи офтобӣ дар Белгия дар соли 2025 нисбат ба соли гузашта 21 фоиз афзоиш ёфта, ба нишондиҳандаи рекордӣ расидааст. Дар натиҷа, саҳми манбаъҳои барқароршавандаи энергия дар тавозуни энергетикии ин кишвар қариб ба сатҳи неруи ҳастаӣ баробар шудааст, хабар медиҳад Шабакаи энергетии Белгия - ширкати Elia.

Тибқи гузориши солонаи Elia, ҳаҷми истеҳсоли энергияи офтобӣ дар соли ҷорӣ ба 10,1 тераватт-соат мерасад, ки баландтарин нишондиҳанда дар таърихи ин кишвар мебошад. Танҳо дар моҳи июн рекорди ҳармоҳа - 1370 гигаватт-соат  ба қайд гирифта шудааст. Ба гуфтаи ширкат, ин афзоиш пеш аз ҳама ба васеъ гардидани иқтидори насбшудаи неругоҳҳои офтобӣ (+10 фоиз) ва шароити мусоиди обу ҳаво вобаста аст.

Дар ҳамин ҳол, шароити иқлимӣ дар Аврупои Ғарбӣ барои неруи бод чандон мувофиқ набуд. Бо вуҷуди афзоиши иқтидор, истеҳсоли неруи бодӣ дар сатҳи 12,3 тераватт-соат боқӣ монда, нисбат ба соли гузашта 2 фоиз коҳиш ёфт.

Истеҳсоли неруи ҳастаӣ дар Белгия низ коҳиш ёфтааст. Дар соли 2025 ҳаҷми он 22,5 тераватт-соатро ташкил дод, ки нисбат ба соли гузашта 24 фоиз камтар аст. Бо вуҷуди ин, неруи ҳастаӣ ҳамоно 34 фоизи бозори энергетикии кишварро дар бар мегирад. Коҳиши истеҳсол ба баста шудани се реактори ҳастаӣ марбут аст.

Дар маҷмуъ, истеҳсоли ҳамаи манбаъҳои барқароршавандаи энергия дар Белгия ба 22,4 тераватт-соат расида, нисбат ба соли гузашта 7 фоиз афзоиш ёфтааст. Ин нишондиҳанда 34 фоизи тавозуни энергетикии ин кишварро ташкил медиҳад, ки рекорди нав ба ҳисоб меравад.

Гузориш ҳамчунин, нишон медиҳад, Белгия соли сеюм аст, ки воридкунандаи холиси нерӯи барқ боқӣ мемонад. Ҳаҷми умумии воридот нисбат ба содирот 14 тераватт-соат бештар аст. Қисми асосии нерӯи барқ аз Фаронса ва Нидерландия (ҳар кадом тақрибан 10 тераватт-соат) ворид мегардад, дар ҳоле ки Белгия неруи барқро ба Олмон, Британияи Кабир ва Люксембург содир мекунад. Ҳаҷми умумии мубодилаи байналмилалии неруи барқ бо кишварҳои ҳамсоя 42 тераватт-соатро ташкил медиҳад.

Ёдовар мешавем, ки дар Паёми Президенти Ҷумҳурии Тоҷикистон муҳтарам Эмомалӣ Раҳмон дар бораи самтҳои асосии сиёсати дохилӣ ва хориҷии ҷумҳурӣ роҳбарияти Вазорати энергетика ва захираҳои об вазифадор карда шуданд, ки ҳамкориро бо сармоягузорони ватанӣ ва хориҷӣ ҷиҳати бунёди неругоҳҳои барқи офтобӣ тақвият бахшида, барои татбиқи саривақтии лоиҳаҳо тадбирҳои фаврӣ андешанд.

Dialog.tj