Дар ростои ҳодисаи гӯшношунид, ки як навраси 10-солаи тоҷик дар Русия кушта шуд, вазири корҳои дохилии Ҷумҳурии Тоҷикистон генерал-полковники милитсия Рамазон Раҳимзода бо Вазири корҳои дохилии Федератсияи Россия генерали политсия Колоколтсев В.А. суҳбати телефонӣ анҷом дод.

Тавре ки маркази матбуоти Вазорати корҳои дохилӣ хабар медиҳад, зимни суҳбат Рамазон Раҳимзода аз Колоколтсев В.А. талаб кардааст, ки сабабу омилҳои ин ҳодиса ҳамаҷониба санҷида ва чораҷӯӣ карда шавад.

“Дар рафти суҳбати телефонӣ қайд гардид, ки содир гардидани чунин ҷиноятҳои мудҳиш метавонад боиси вазъи ногувори ҷомеа шуда, барои дигар гурӯҳҳои радикалии миллатгаро талқин ва таҳрики содир намудани чунин ҷиноятҳо гардад”, - навиштааст манбаъ.

Иттилоъ дода мешавад, ки ҷониби Россия иброз намудааст, ки барои ҳаматарафа ва воқеъбинона гузаронидани тафтишот тамоми чораҳои қатъӣ андешида мешавад.

Ёдовар мешавем, ки 16-уми декабр дар мактаби Успенскии ноҳияи Одинсоваи шаҳри Москва ноболиғи 15-солаи рус ба навраси 10-солаи тоҷик бо корд ҳамла карда, ӯро ба қатл расонд.

Dialog.tj