Дар паёми шодбошии худ, ба ифтихори Рӯзи Парчами давлатии Ҷумҳурии Тоҷикистон, Пешвои миллат, муҳтарам Эмомалӣ Раҳмон тамоми шаҳрвандонро самимона табрик намуда, парчамро яке аз муқаддастарин рамзҳои давлатдорӣ, ифтихори миллӣ ва ҳувияти тоҷикон номиданд.

Пешвои миллат, муҳтарам Эмомалӣ Раҳмон  таъкид намуданд, ки Пачами давлатӣ барои ҳар миллат рамзи истиқлол, озодихоҳӣ ва иродаи қавии мардум аст: «Он нишонаи ваҳдат, сарҷамъӣ ва талошҳои таърихии миллати тоҷик барои ҳифзи озодӣ ба шумор меравад.»

Президент ёдовар шуданд, ки суннати парчамдорӣ дар фарҳангу давлатдории тоҷикон таърихи чандинҳазорсола дошта, аз Дирафши Ковиёнӣ то парчами имрӯзии давлатдории миллӣ тӯли асрҳо идома ёфтааст.

Дар паём таъкид гардид, ки қабули Парчами давлатӣ дар Иҷлосияи XVI-и Шурои Олӣ (соли 1992) пояи давлатдории навини тоҷиконро устувор кард ва аз он рӯз то имрӯз миллати тоҷик дар зери ин парчам ба сулҳу субот, амният ва созандагӣ ноил гардидааст.

Пешвои миллат зикр карданд, ки имрӯз парчами Тоҷикистон дар тамоми созмонҳои байналмилалӣ, варзишгоҳҳо, мусобиқаҳои ҷаҳонӣ ва чорабиниҳои сатҳи баланд ҳамчун рамзи кишвари озоду ҳуқуқбунёд парафшон аст.

Сарвари давлат аз шаҳрвандон даъват намуданд, ки эҳтироми парчами миллиро ба фарзандон омӯзанд, зеро муҳаббат ба парчам нишонаи имон ба миллат, давлат ва фарҳанги бостонии тоҷикон аст. Ба гуфтаи Пешвои миллат, парафшон нигоҳ доштани парчам вазифаи виҷдонии ҳар як шаҳрванди худшинос мебошад.

Дар фарыоми паёми худ Президент таъкид карданд, ки таҳти ин рамзи муқаддас бояд барои ободии Тоҷикистон, ҳифзи арзишҳои миллӣ ва истиқболи шоистаи 35-солагии Истиқлол саъю талош намоем.

Dialog.tj