Созмонҳои ҳомии ҳуқуқи занон дар Фаронса бо шиори “Вақти ҳушдор гузаштааст, вақти амал фаро расидааст”, аз афзоиши ҷиноятҳои вобаста ба куштори занон аз сӯи шавҳарони ҳозира ё собиқашон изҳори нигаронӣ мекунанд.

Бар асоси иттилои расонаҳо ниҳоди давлатӣ барои ҳимояи ҳуқуқи занон - MIPROF дар гузориши солонаи худ барои соли 2024, ки рӯзи панҷшанбе 20-уми ноябр нашр гардид, эълон намуд, ки ҳар 7 соат дар Фаронса як зан ё кушта мешавад ва ё мавриди талоши куштор қарор мегирад ва ё ба худкушӣ рӯ меоварад. Аксари ин амалҳо аз ҷониби шавҳарони имрӯзӣ ё собиқ анҷом дода мешавад.

Ин гузоришро Маркази миллии мубориза бо зӯроварӣ бар зидди занон таҳия карда, ба MIPROF пешниҳод намудааст.

Тибқи иттилои MIPROF ҳар ду дақиқа як зан дар Фаронса қурбони тоҷовуз ё талоши таҷовуз мешавад. Ҳамчунин, ҳар 23 сония як зан ба озору рафтори номатлуби ҷинсӣ дучор мегардад.

Дар ин кишвар куштори занон дар соли 2024 нисбат ба соли 2023 11% бештар шудааст. 107 зан ба дастони шарики имрӯзӣ ё собиқи худ кушта шудаанд. 270 зан мавриди талоши куштор қарор гирифтаанд. 906 зан қурбони озору таъқиби ҷинсӣ аз ҷониби шарики худ шудаанд, ки боис ба худкушӣ ё талоши худкушӣ гардидааст. Дар маҷмуъ, 1283 зан дар соли 2024 қурбони зӯроварии оила шудаанд, ин дар ҳоле ки ин рақам дар соли 2023, 1196 нафар буда.

Тибқи гузориши рӯзномаи “Ле мондӣ”, созмонҳои ҳомии ҳуқуқи занон мардумро даъват намуданд, ки рӯзи шанбе, 22-уми ноябр ба эътирозҳои густурда бароянд. Ин ҷамъомадҳо дар Порис ва даҳҳо шаҳри дигар, аз ҷумла Лил, Лион, Ла Рошел ва Бордо, бо меҳвари эътирози занон баргузор мешавад.

Созмони эътирози занон, ки аз 60 иттиҳодия ва анҷумани ҳомии ҳуқуқи занон иборат аст, роҳбарияти ин тазоҳуротро дар Порис ба уҳда дорад.

Дар як баҳси дигар Сюзи Ружтман, сухангӯи Созмони миллии ҳуқуқи занон гуфт, ки “Дар Фаронса ҳатто баъзе афсарони полис ба таҷовуз дар зиндонҳо муттаҳам мешаванд. Куштори занон дар хона зиёд мешавад, то ҳол барномаи ҳамаҷонибае барои муқобила бо зӯроварии ҷинсӣ дар донишгоҳҳо вуҷуд надорад”.

Ӯ таъкид намуд, ки ба як нақшаи ҷиддии миллӣ барои мубориза бо зӯроварии ҷинсӣ ва табъиз дар донишгоҳҳо ниёз доранд.

Созмонҳои ҳомии ҳуқуқи занон аз сиёсати ҳукумати Эммануэл Макрон низ интиқод намуда, онро нокифоя меҳисобанд. Макрон дар оғози даври дуюми раёсати худ ваъда дода буд, ки “мубориза бо зӯроварӣ бар зидди занон” меҳвари асосии сиёсати ӯ хоҳад буд.

Гузориш меафзояд, ки бо вуҷуди иқдомҳои кишвар, аз ҷумла рақами телефони кумак, дастбандиҳои электронӣ ва кумакҳои фаврӣ, фаъолон ин тадбирҳоро кофӣ намедонанд ва мегӯянд, ки буҷаи ҷудошуда низ хеле кам мебошад.

Созмонҳои занон ҳамчунин, аз рад кардани шикояти занон, ҷазо нагирифтани бисёре аз ҷинояткорон, мушкилоти сохторӣ дар раванди баррасии парвандаҳо ва ғайра интиқод мекунанд.

Dialog.tj