Президенти Иёлоти Муттаҳидаи Амрико Доналд Трамп рӯзи 14-уми ноябр гуфт, ки навобаста аз узрхоҳии расмии медиакорпоратсияи Британия Би-би-сӣ аз болои он ба додгоҳ муроҷиат хоҳад кард.

Би-би-сӣ барои таҳрири баҳсбарангези қисматҳои суханронии Доналд Трамп дар барномаи “Панорама” узр пурсид, вале аз пардохти ҷуброн комилан худдорӣ кард.

Доналд Трамп ба хабарнигорон дар вақти сафари хизматӣ бо ҳавопайо гуфт: “Мо мехоҳем ба онҳо дар ҳаҷми аз як то панҷ миллиард доллар ситонидани зарари молиявӣ муроҷиат кунем. Эҳтимолан дар ҳафтаи оянда. Фикр мекунам маҷбур мешавам, ин корро кунам. Онҳо ҳатто ба қаллобӣ иқрор шудаанд”.

Тибқи гуфтаи ӯ, то ҳол масъала бо нахуствазири Британияи Кабир Кир Стармер баррасӣ нашудааст, аммо Доналд Трамп мақсад дорад дар рӯзҳои наздик бо ӯ тамос гирад. Президент таъкид кард, ки Кир Стармер талош дорад, бо ӯ робита кунад ва аз ин рӯйдод “дар ҳолати ногувор” мондааст.

Ин баҳс ба филми мустанади “Трамп: имкони дувум” рабт дорад, ки қабл аз интихоботи президентии соли 2024 нашр шуда буд. Дар он се порча аз суханронии Доналд Трамп рӯзи 6-уми январи соли 2021 ба шакле таҳрир шудаанд, ки гӯё мардумро ба хушунат дар вақти ҳамла ба Капитолия даъват мекунад.

Кохи сафед “Би-би-сӣ”-ро дар паҳн кардани “хабарҳои бардурӯғ” муттаҳам намуд. Вакилони Доналд Трамп тақозо карданд, ки корпоратсия ин иттиҳомро рад кунад, узр пурсад ва 1 миллиард доллар ҷуброн пардохт намояд. Дар пайи ин қазия директори генералии Би-би-сӣ Тим Дэйви ва роҳбари бахши хабарии он Дебора Тернесс истеъфо доданд.

Раиси Шурои Би-би-сӣ Самир Шоҳ дар номае ба Кохи сафед аз таҳрири нодурусти суханронии Доналд Трамп изҳори таассуф намуд. Корпоратсия эълон кард, ки ин барнома дигар такроран нашр нахоҳад шуд.

Dialog.tj