Федератсияи футболи Тоҷикистон аз қавли сармураббии мунтахаби Тоҷикистон (U-17) Марко Раҷини ҳунарнамоии тими миллиро дар Ҷоми ҷаҳон-2025, ки дар даври гурӯҳӣ дар се бозӣ се бохт ба қайд гирифт, шарҳ дод.

Нахуст, Марко Раҷини гуфтааст, ки шикаст дар се бозии марҳилаи гурӯҳӣ маънои онро надорад, ки баромади даста нобарор буд. Балки футболбозони тоҷик имкон доштанд бо дастаҳои беҳтарини ҷаҳон рақобат кунанд.

“Ман аз бозигарон тамоман шикоят надорам. Ҳар яки онҳо дар майдон 100% кӯшиш карданд. Аммо воқеият ин аст, ки мо ҳанӯз ба сатҳи дастаҳои калон нарасидаем. Бешубҳа ба ин ноил хоҳем шуд, аммо танҳо бо вақти кофӣ ва нақшаи возеҳ”, - зикр кардааст сармураббӣ.

Марко Раҷини афзудааст: “Муваффақияти дастаҳои пурқувват натиҷаи чандинсолаи сармоягузорӣ дар инфрасохтор, таълими мураббиён ва системаҳои омӯзиш мебошад. Расидан ба сатҳи зарурӣ дар чунин мусобиқаҳо ба монанди Ҷоми ҷаҳон вақт ва сармоягузории назаррасро талаб мекунад”.

Ҳамчунин, сармураббии мунтахаби Тоҷикистон (U-17) илова намудааст, ки дар муддати якуним соли фаъолияташ ҳар ваъдае, ки ба ФФТ додааст, иҷро намудааст.

Dialog.tj