Эмомалӣ Раҳмон, президенти Ҷумҳурии Тоҷикистон рӯзи 19-уми октябр дар Қасри миллат Муҳаммадризо Ориф, муовини аввали Президенти Ҷумҳурии Исломии Эронро ба ҳузур пазируфт.

Муҳаммадризо Ориф, муовини аввали Президенти Ҷумҳурии Исломии Эрон ҷиҳати иштирок дар ҷаласаи Шурои сарони ҳукуматҳои кишварҳои Созмони ҳамкории Шанхай ба шаҳри Душанбе омад.

Эмомалӣ Раҳмон ва Муҳаммадризо Ориф дар ҷараёни мулоқот пешниҳоди таъсиси Иттиҳоди кишварҳои форсизабон ва рушди тиҷорату энергетика ва роҳҳои транзитиро баррасӣ намуданд.

Таъкид шуд, ки ҳадафи пешниҳоди таъсиси кишварҳои форсизабон ва минтақаҳои форсизабон ба ҳам наздик намудани кишвар ва ҷомеаҳоест, ки бо забон, адабиёт ва мероси таърихии муштарак пайванд доранд.

Дар ин мулоқот ҷонибҳо масъалаи таъсиси кумитаи муштараки забон, адабиёт ва фарҳанги форсӣ, ташкили марказҳои таҷлили Наврӯз ва таъсиси маркази тамаддуни ориёиро низ баррасӣ намудаанд.

Эмомалӣ Раҳмон ва Муҳаммадризо Ориф масъалаи густариши равобити иқтисодиро низ баррасӣ намудаанд ва ин яке аз мавзуҳои муҳимми гуфтугӯи ду ҷониб буд.

Дафтари матбуоти Президенти Тоҷикистон навишт, ки дар ин мулоқот “Ба густариши пайгиронаи ҳамкории тиҷоративу иқтисодӣ, аз ҷумла дар соҳаҳои нақлиёт, энергетика, саноат, кишоварзӣ, тандурустӣ, дорусозӣ ва дигар бахшҳои афзалиятнок, инчунин, масъалаҳои васеъ намудани номгӯи молу маҳсулот барои тиҷорати дуҷониба ва рушди истеҳсолоти муштарак таваҷҷуҳи зиёд зоҳир гардид”.

Муҳаммадризо Ориф таъкид намуд, ки табодули тиҷоратии Эрон ва Тоҷикистон дар моҳҳои ахир нисбат ба ҳамин давраи соли гузашта 50 фоиз афзоиш ёфтааст.

Муҳаммадризо Ориф ҳамчунин, таъкид намуд, ки Эрон дар ҷустуҷӯ ва иктишофи нафту газ, рушди саноати нафту кимиё ва содироти маҳсулоти нафтӣ ба Тоҷикистон омодааст.

Бар асоси иттилои расонаҳои Эрон дар мулоқоти дуҷониба масъалаи таъсиси долони энергетикӣ ба воситаи Эрон, Афғонистон ва Тоҷикистон матраҳ гардид. Ба навиштаи расонаҳои эронӣ, агар ин идея ба тарҳи мушаххас табдил ёбад, метавонад барои густариши ҳамкориҳои энергетикӣ ва ташкили роҳҳои нави интиқоли захираҳои энергетикӣ замина фароҳам кунад.

Дар ин мулоқот масъалаи пайвастани Тоҷикистон ба обҳои озоди Халиҷи Форс ва густариши содироти маҳсулоти нафтии Эрон мавриди баррасӣ қарор гирифт.

Дар мулоқоти Эмомалӣ Раҳмон бо Муҳаммадризо Ориф масъалаи ҳамкории ду кишвар дар доираи СҲШ яке аз мавзуҳои муҳимми гуфтугӯи дуҷониба буд.

Муҳаммадризо Ориф таъкид намуд, ки “Эрон ва Тоҷикистон метавонанд дар чорчӯби Созмони ҳамкории Шанхай ҳамкории наздиктаре дар заминаи каридори транзитӣ, амнияти марзҳо, муқобила бо терроризм ва қочоқи маводи мухаддир ва ҳамчунин, таҳаввулоти Афғонистон дошта бошанд”.

Dialog.tj