Сенати Иёлоти Муттаҳидаи Амрико бори 12-ум натавонист лоиҳаи қонунеро, ки барои идома додани маблағгузории ҳукумати федералӣ зарур аст, қабул намояд. Ин санад барои ба поён расондани “шатдаун” пешбинӣ гардида буд.

Бар асоси иттилоъ, 54 сенатор аз лоиҳа ҷонибдорӣ карда, 46 нафар муқобил баромаданд. Ин дар ҳолест, ки барои тасвиби он ҳадди ақал 60 фоиз овоз зарур буд.

“Шатдаун” аз аввали моҳи октябр давом дорад ва бо сабаби он ихтилофот миёни ҷумҳурихоҳон ва демократҳо дар хусуси бахшҳои калидии буҷа, аз ҷумла тандурустӣ аст.

Ин вазъият дувумин танаффуси тӯлонитарини маблағгузории ҳукумат баъд аз “шатдаун”-и 35-рӯза дар охири солҳои 2018, аввали соли 2019 ба шумор меравад, ки дар даври аввали президентии Доналд Трамп рӯй дода буд.

Вазорати молияи Иёлоти Муттаҳидаи Амрико мегӯяд, ки зарари ҳаррӯзаи буҷет аз ин ҳолат то ба 15 миллиард доллар мерасад. Роҳбари вазорат Скотт Бессант таъкид кард, ки буҳрон ба истеҳсолот ва сармоягузорӣ зарбаи сахт зад.

Мудири Шурои миллии иқтисодӣ Кевин Ҳассет ҳушдор дод, ки ҳар қадар “шатдаун” тӯл кашад, ҳамон қадар хатари ихроҷи оммавии кормадони давлатӣ зиёд мешавад.

Бар асоси гузориши сиёсатшиносон дар сурати танаффуси якмоҳа дар маблағгузорӣ тақрибан 43 ҳазор нафар, ба ҷуз 1,9 миллион хизматчиёни федералӣ, ки ё дар рухсатии бемаош қарор доранд ё ба шарти набудани маош корро идома медиҳанд, метавонанд муваққатан бекор монанд.

“Шатдаун” дар Иёлоти Муттаҳидаи Амрико маънои боз мондани кори ниҳодҳои давлатӣ аз тасдиқ нашудани буҷаи давлатӣ аз сӯи конгессро дорад.

Dialog.tj