Шоир, нависанда ва суруднависи маъруфи ҳиндӣ Ҷовид Ахтар Толибонро “бадтарин гурӯҳи террористии ҷаҳон” номид ва аз истиқболи густурдаи ҳайати Толибон дар Ҳиндустон шадидан интиқод кард.

Ҷовид Ахтар дар шабакаи иҷтимоии “Х” навишт, ки Толибон дар Ҳиндустон аз ҷониби касоне истиқбол ёфтанд, ки ҳамеша худро мухолифи терроризм медонанд. Ӯ афзуд, ки “нанг бод бар Дорулулуми Деобанд, ки аз касоне, ки таҳсили духтаронро мамнуъ кардаанд, ба ҳайси “қаҳрамонони исломӣ” истиқбол мекунанд”.

Ҳафтаи гузашта Амирхон Мутаққӣ, вазири корҳои хориҷии ҳукумати гурӯҳи террористии Толибон ба Ҳиндустон сафар намуда, аз Дорулулуми Деобанд, яке аз қадимитарин марказҳои динии Ҳиндустон боздид кард. Ин боздид бо истиқболи пуршӯри толибилмон ва уламои динӣ рӯ ба рӯ шуд.

Сафари ӯ бо моҷароҳои зиёд, аз ҷумла манъи вуруди хабарнигорони зан ба нишасти матбуотии вазир  дар сафорати Афғонистон дар Деҳлӣ ҳамроҳ буд.

Мақомоти Толибон рӯзи ҷумъа аз ҳузури занон дар нишасти матбуотӣ пешгирӣ карданд, ки ин амр эътирозҳои густурдаи ҷомеаи журналистӣ, созмонҳои занон ва мухолифони ҳукумати Нарендра Модиро ба бор овард.

Баъди ду рӯз Вазорати корҳои хориҷии Ҳиндустон аз Амирхон Мутаққӣ хост, ки нишасти матбуотии дигар бо ҳузури хабарнигорони зан доир кунад.

Ин сафар, ба таъкиди он, ба баҳси густурда дар хусуси муносибати Ҳиндустон бо Толибон ва мавқеи он дар масъалаи ҳуқуқи занон доман зад.

Dialog.tj