Сарчашмаҳои хабарӣ гузориш доданд, ки мавҷи бузурге аз ҳавопаймоҳои сӯхтрасони КС-135 Stratotanker-и неруҳои ҳавоии Амрико вориди Ховари Миёна шудааст. Ин иқдом яке аз бузургтарин ирсолҳои ҳавопаймоҳои сӯхтрасон дар моҳҳои ахир шумурда мешавад.

Тибқи гузориши “Newsweek” пайгирии парвозҳо нишон медиҳад, ки ҳавопаймоҳо аз пойгоҳҳои ҳавоии соҳили Уқёнуси Атлант парвоз карда, ҳоло дар пойгоҳи ҳавоии Ал-Удейд дар Қатар – маркази фармондеҳии Амрико дар минтақа – мустақар шудаанд.

Ин иқдом дар ҳоле сурат мегирад, ки таниш бо Эрон боло гирифта ва Теҳрон ҳушдор додааст, дар сурати ҳамла посухи ҷавобӣ хоҳад дод. Ин иқдом, ба гуфтаи таҳлилгарон, нишонаи болоравии сатҳи омодагии низомии Амрико дар минтақа мебошад.

Ин расона менависад, ки ирсоли ногаҳонии даҳҳо ҳавопаймои сӯхтрасон дар шароите иттифоқ меафтад, ки муҳити минтақавӣ сахт ноустувор бошад. Бунбасти музокироти атомӣ, идомаи таҳрим ва эҳтимоли даргириҳои нав бо Исроил метавонад вазъиятро ба зуддӣ муташанниҷ кунад. Аз ҳамин рӯ, ҳамкории дипломатӣ ва назорати дақиқ дар ҳафтаҳои оянда аҳамияти ҳалкунанда хоҳад дошт.

Дар пайи нашри ин хабар, сомонаи “Нурнюз”, расонаи наздик ба Шурои амнияти миллии Эрон, ба нақл аз раиси Ситоди кулли неруҳои мусаллаҳи Эрон навишт: “Барои даргирии эҳтимолӣ омодаем”.

“Нурнюз” мақсади ин иқдоми Амрикоро “нишон додани тавоноии логистикӣ барои идомаи амалиёти ҳавоӣ” ва ҳамзамон “ирсоли паёми сиёсӣ” арзёбӣ кардааст.

Ин расона ҳамчунин, ба нақл аз Аббос Ироқчӣ, вазири корҳои хориҷии Ҷумҳурии Исломӣ хабар дод, ки “Амрико дарҳоро ба рӯи дипломатия бастааст.  Ҳадафи механизми “Снап-бек” ва узрхоҳии Нетаняҳу аз арабҳо, заминасозӣ барои таҳдиди низомӣ ва қаҳрамон нишон додани Трамп аст”.

“Нурнюз” дар гузориши худ ба унвони “Оё Трамп бо кортҳои Эрон қимор мекунад” навишт: “Ин иқдом ду паём дорад: яке ба муттаҳидони минтақавӣ, ки Амрико мехоҳад ҳомии амнияташон бимонад ва дигаре ба Теҳрон то бидонад, ки имкони низомӣ ҳанӯз дар рӯи миз аст”.

Dialog.tj