Гурӯҳи террористии Толибон баъди се рӯзи қатъи интернет дар Афғонистон онро дубора фаъол намуданд. Се рӯз қабл бо дастури роҳбари гурӯҳи Толибон интернет дар саросари Афғонистон қатъ шуда буд.

Расонаҳои афғонистонӣ навиштанд, ки баъди 49 соати хомӯшиву қатъи комили интернет ва хизматрасонии симкортҳо дубора шабакаҳои мухобиротӣ дар Афғонистон фаъол шуданд. Ин бозгашт мавҷи бузурге аз хӯшҳоливу оромишро дар саросари кишвар, бахусус Кобул ба ҳамроҳ овард ва бисёре аз оилаҳо тавонистанд, ки бори дигар бо азизонашон дар хориҷ аз кишвар дар тамос шаванд.

Қатъи саросарии интернет дар Афғонистон ба мавҷи вокунишҳои шадиди байналмилалӣ рӯ ба рӯ гардид. Созмонҳои байналмилалӣ ин амалкарди Толибонро маҳкум намуда, хостори фаъол кардани интернет шудаанд.

Дар пайи қатъи интернет ҳазорон касбу кори гуногун, ки ба интернет вобаста буд, дар Афғонистон маътал шуд. Аз ҷумла, мушкил дар парвози хатсайрҳои ҳавоии Кобул ба вуҷуд омад ва парвози баъзе хатсайрҳо комилан қатъ шуд.

Гурӯҳи террористии Толибон далели қатъи интернетро корҳои техникӣ, аз ҷумла иваз кардани ноқилҳои кӯҳнаи хати интернет гуфтанд. Бархе расонаҳои афғонистонӣ иттилоъ доданд, ки қатъи саросарии интернет ба хотири ҷобаҷогузории гурӯҳҳои террористӣ дар дохили Афғонистон сурат гирифтааст. Ҳамчунин, бархе иттилооти расман тасдиқнашуда нашр шуд, ки Толибон бо қатъи саросарии интернет пойгоҳи Багром ва баъзе пойгоҳҳои дигарро дар ихтиёри амрикоиҳо қарор доданд.

Dialog.tj