Дар вилояти Хатлони Ҷумҳурии Тоҷикистон кишоварзон ният доранд, ки то охири мавсими ҷорӣ беш аз 254 ҳазор тонна пахта ҷамъоварӣ кунанд. Дар ин хусус мақомоти иҷроияи ҳокимияти давлатии вилояти Хатлон иттилоъ доданд.

Аз миёни 19 шаҳру ноҳияи вилояти Хатлон, ки дар он ҷо пахтакорӣ ба роҳ монда шудааст, деҳқонони Левакант ва Бохтар нахустин шуда, нақшаҳои ҷумҳуриявиро иҷро кардаанд.

Дар Левакант пахта дар майдони 1030 гектар кишт шудааст ва нақшаи ҷамъоварӣ тақрибан 2, 3 ҳазор тонна буд. Ба иттилои расмӣ то имрӯз аз он ҷо 2345, 7 тонна пахта супорида шудааст, ки 101, 99% иҷрои нақшаро ташкил медиҳад.

Дар Бохтар бошад, пахта дар майдони 250 гектар кишт шуда, нақшаи ҷамъоварии он 518 тонна буд. То ба имрӯз аз он ҷо 518, 9 тонна пахта ҷамъоварӣ шудааст, ки 100, 74 % нақшаро ташкил медиҳад.

Мақомот мегӯянд, тамоми ҳосили пахтаи ҷамъоваришуда сари вақт ба нуқтаҳои пахтақабулкунӣ супорида шудаанд.

Дар маҷмуъ, соли ҷорӣ дар Хатлон 123 ҳазор гектар замин бо пахта кишт карда шудааст. Ба ҳолати 22-уми сентябр, кишоварзон аз ҳоло 122, 9 ҳазор тонна ҳосил ҷамъ кардаанд, ки 48, 35% нақшаи умумиро ташкил медиҳад.

Тибқи гуфтаи мақомоти вилоят ҳосил хуб аст ва деҳқонон ният доранд, маъракаи пахтачинӣ дар муддати кӯтоҳ ба анҷом расонда шавад.

Пахта, ки дар Ҷумҳурии Тоҷикистон бо номи анъанавии “тилои сафед” машҳур аст, то ҳол яке аз зироатҳои асосии кишоварзӣ боқӣ мондааст. Он ҳамчун ашёи хом барои саноати коркард ва ҳам ҳамчун сарчашмаи ҷойҳои корӣ барои аҳолии деҳот нақши муҳимро иҷро мекунад.

Dialog.tj