Эммануэл Макрон, Президенти Ҷумҳурии Фаронса дар ҷараёни суханронии худ дар Маҷмаи Умумии Созмони Милали Муттаҳид гуфт, ки рӯзи чоршанбе бо Президенти Ҷумҳурии Исломии Эрон мулоқот хоҳад кард, то масъалаи “снеп-бек” (бозгашти таҳримҳо)-ро мавриди баррасӣ қарор диҳад. Ӯ таъкид кард, ки соатҳои оянда барои нақши Агентии байналмилалии неруи атомӣ дар масъалаи Эрон сарнавиштсоз хоҳанд буд.

“Эрон фақат масъули нақзи уҳдадориҳои худ аст, вале қарор аст, дарҳоро ба рӯи Агентӣ боз кунад” – таъкид кард Эммануэл Макрон.

Ӯ бо ишора ба Барномаи сулҳомези атомии Эрон, ки ҳамеша зери фишорҳои сиёсӣ ва иттиҳомоти беасоси Ғарб қарор дошт, гуфт: “Қадамҳои оянда бисёр муҳиманд: ё Эрон амал мекунад ва ба роҳи сулҳ ва посухгӯӣ бармегардад ё бояд механизми снеп-бек фаъол шавад”.

“Сулҳ дар минтақа фақат дар сурате мумкин аст, ки Барномаи атомии Ҷумҳурии Исломии Эрон дубора пурра зери назорат қарор гирад”- гуфт Эммануэл Макрон.

Президенти Фаронса ҳамчунин, бо ишора ба иқдоми кишварҳо дар хусуси ба расмият шинохтани кишвари Фаластин аз ҳама кишварҳои ҷаҳон даъват кард, ки барои барқарории сулҳ дар сарзаминҳои ишғолшуда аз ин иқдом пайравӣ кунанд.

“Мо омодаем роҳи сулҳи фаврӣ, озодии гаравгонҳо, барқарории оташбас ва устуворсозии вазъ дар Ғаззаро ҳамвор кунем; ғайринизомсозии минтақа ба воситаи барҳам задани Ҳамос ва шинохти мутақобили Исроил ва Фаластин зарур мебошад.

Ин сулҳ ба маънии таъсиси кишвари Фаластин бо мақоми ғайринизомӣ хоҳад буд, ки Исроилро ба расмият мешиносад ва баръакс, Исроил низ давлати Фаластинро ба расмият хоҳад шинохт” – таъкид намуд Эммануэл Макрон.

Ӯ ба Исроил ҳушдор дод, ки агар дар пайи ҷанги абадӣ бо ҳамсоягони худ бошад, барои он на аҳамияте хоҳанд монд ва на субот.

Президенти Фаронса ҳамчунин, даъват кард, ки ҷомеаи ҷаҳонӣ аз Додгоҳи байналмилалии ҷиноятӣ (ICC)  ва Додгоҳи байналмилалии адлия (ICJ) ҳимоят кунад: “Биёед муборизаи додгоҳи байналмилалии ҷиноятиро бар зидди масуният аз ҷазо пуштибонӣ кунем ва иҷоза диҳем, ки ҳукмҳои додгоҳи байналмилалии адлия иҷро шаванд, зеро нуфуз ва қувваи қонун беҳтарин имкони мо барои пешгирӣ аз боло гирифтани мантиқест, ки “ҳақ бо майдони қавӣ” аст.

Ӯ бо ишора ба таҳаввулоти фарогири ҷаҳонӣ ҳушдор дод, ки кӯшишҳои муштараки кишварҳо барои мубориза бо буҳронҳои экологӣ коҳиш ёфтааанд ва таъкид намуд, ки “тағйирёбии иқлим дигар таҳти назорат нест ва гуногунрангии биологӣ дар ҳоли суқут қарор дорад”.

“Талошҳое, ки аксари мо барои муқобила бо буҳронҳои экологӣ омодаем анҷом диҳем, бо монеа рӯ ба рӯ шудаанд ва ин монеа аз ҷониби онҳоест, ки қудрати тағйир додани вазъро доранд, аммо аз амал худдорӣ мекунанд”- таъкид намуд Эммануэл Макрон.

Президенти Фаронса таъкид намуд, ки зоҳир сохтани ихтилофҳо тартиботи ҷаҳониро халалдор мекунад ва қудрати ҷамъиро барои ҳалли низоъҳои бузурги замон аз миён мебарад ва тавони рӯёрӯӣ бо проблемаҳои ҷаҳониро мегирад.

Эммануэл Макрон бо ишора ба 80 –солагии таъсиси Созмони Милали Муттаҳид гуфт, ки “вазъияти феълӣ ва нохушии ҷаҳон қобили қабул нест: “Бисёриҳо мепурсанд, ки оё ваъдаҳои Созмони Милал амалӣ шудаанд, бо воқеият мувофиқ ҳастанд ва фоидае ба ҳамроҳ доранд ё на.

Бояд ёдовар шуд, ки низоъҳо дар сатҳҳои байналмилалӣ, миллӣ ва дохилии кишварҳо дар саросари ҷаҳон, аз ҷумла дар Ҳоитӣ, Бирма, Украина ва Ҷумҳурии демократии Конго афзоиш ёфтаанд.

“Фаъолияти ҷиноятӣ ва террористӣ зиёд шудаанд ва консепсияҳои Женева қасдан поймол мешаванд”- гуфт Президенти Фаронса.

Dialog.tj