Эмомалӣ Раҳмон, Президенти Ҷумҳурии Тоҷикистон дар Иҷлосияи 80-уми Маҷмаи Умумии Созмони Милали Муттаҳид суханронӣ карда, ҳама кишварҳои узвро ба муносибати 80-умин солгарди қабули Оинномаи Созмони Милал самимона табрик намуданд.

Дар ҷараёни суханронии худ Сарвари кишвари Тоҷикистон ба ҳолати ноустувориву номуайянӣ дар ҷаҳон, ихтилофоти геосиёсӣ, мухолифату низоъҳо дар минтақаҳои гуногун ва хатарҳои амниятӣ таъкид карда, нақши Созмони Милали Муттаҳидро ҳамчун минбари муколама, ҳамкорӣ ва таҳкими сулҳу амният бештар аз пеш муҳим арзёбӣ карданд.

Сарвари Тоҷикистон ҳамчунин, зарурати ҳифзи ҳуқуқи байналмилалӣ, тақвияти ҳамкории баробарҳуқуқи давлатҳои хурду бузург ва ҳимоят аз стратегияи миллии рушди Тоҷикистон то соли 2030 бо Ҳадафи рушди устуворро таъкид карданд.

Роҳбари кишвар ба мушкилоти вобаста ба тағйирёбии иқлим, афзоиши нобаробарии иҷтимоӣ ва оқибатҳои офатҳои табиӣ, аз ҷулма обхезӣ, хушксолиҳо ва хокборишҳо ишора карда, зарурати чораҷӯӣ ва маблағгузории устувор барои кишварҳои осебпазирро хотиррасон карданд.

Президенти Ҷумҳурии Тоҷикистон ҳамчунин, ба масъалаҳои об, дипломатияи об ва татбиқи Даҳсолаи байналмилалии амал “Об барои рушди устувор, солҳои 2018-2028” таваҷҷуҳ карда, кишварҳои узвро ба ширкати фаъол дар конфронси байналмилалии сатҳи баланд “Раванди оби Душанбе”, ки соли оянда дар Тоҷикистон доир мешавад, даъват намуданд.

Президенти кишвар ба аҳамияти институтҳои қавӣ ва маърифати ҳуқуқӣ дар таҳкими ҷомеаи устувор таъкид намуда, пешниҳод карданд, ки Маҷмаи Умумии СММ Соли байналмилалии маърифати ҳуқуқиро баррасӣ кунад.

Дар идома Эмомалӣ Раҳмон ба нақши технологияҳои рақамӣ ва зеҳни сунъӣ дар рушди устувор, ҳамчунин, зарурати амнияти киберӣ ва муқовимат бо таҳдидҳои ҷаҳонӣ, аз ҷумла терроризм, қочоқи силоҳ ва маводи мухаддир таъкид намуданд.

Сарвари Ҷумҳурии Тоҷикистон мавқеи усулиии кишвари худро дар масъалаи Фаластин, зарурати сулҳи пойдор дар Ховари Миёна бо риояи формулаи “ду кишвар”, ҳамчунин, таъмини сулҳу амният ва рушди иҷтимоиву иқтисодӣ дар Афғонистон маълум намуданд.

Дар поёни суханронӣ Эмомалӣ Раҳмон таъкид намуданд, ки Тоҷикистон ҷонибдори ислоҳоти низоми СММ, ташаббусҳои ҷаҳонӣ дар заминаи сулҳ ва рушди устувор ва барои ҳамкориҳои муштарак бо кишварҳои шарик ва тамоми кишварҳои узви СММ мебошад.

Dialog.tj