Президенти Иёлоти Муттаҳидаи Амрико Доналд Трамп рӯзи 23-уми сентябр ният дорад дар ҳошияи Ассамблеи Генералии Созмони Милали Муттаҳид бо як гурӯҳ аз роҳбарони кишварҳои арабӣ мулоқот кунад. Дар ин хусус нашрияи “Ахиос” бо такя ба сарчамаҳои дипломатии арабӣ гузориш додааст.

Бар асоси иттилои расмӣ, ба ин нишаст сарони Арабистони Саудӣ, Имороти Муттаҳидаи Араб, Қатар, Миср, Урдун, ҳамчунин, президенти Туркия даъват шудаанд. Гуфта мешавад, ки меҳвари гуфтугӯҳо вазъияти фоҷеабори башардӯстона дар минтақаи Ғазза хоҳад буд.

Сарчашмаҳои арабӣ ба “Ахиос” гуфтаанд, ки роҳбарони кишварҳои арабӣ ва мусалмонӣ дар ин нишаст ният доранд, аз Президенти Амрико даъват кунанд, то ба сарвазири Исроил Бенямин Нетаняҳу фишори ҷиддӣ ворид кунад ва ба қатъи низоъ мусоидат намояд.

Қаблан, иттилоъ дода шуда буд, ки 29-уми сентябр, Доналд Трамп Бенямин Нетаняҳуро дар Кохи сафед ба ҳузур хоҳад пазируфт. Ҳамчунин, қарор аст дар ҳамон рӯз роҳбари Иёлоти Муттаҳидаи Амрико бо сарони кишварҳои Шурои ҳамкории Халиҷи Форс, аз ҷумла роҳбарони Арабистони Саудӣ, Имороти Муттаҳидаи Араб, Қатар, Умон, Баҳрайн ва Кувайт мулоқоти ҷудогона анҷом диҳад.

Бар асоси иттилои Ахиос мавзуи калидии ин музокирот нигаронии кишварҳои минтақа аз эҳтимоли густариши зарбаҳои ҳавоии Исроил берун аз ҳудуди Ғазза аст. Ба қавли таҳлилгарон ин мулоқотҳо метавонад ба як марҳилаи нави дипломатӣ миёни Амрико ва кишварҳои арабӣ табдил шавад.

Dialog.tj