Имшаб 69-умин маросими ҷоизасупории “Тӯби тиллоӣ” дар театри “Шатле”-и Париж баргузор мегардад.

Ҳарчанд се довталаби асосии “Тӯби тиллоӣ”-и имсола Усман Дембеле, Рафиня ва Ламин Ямал тағйир наёфтаанд, вале дар расонаҳо матлабҳои гуногун доир ба ивазшавии ҷойҳои онҳо ва тағйири номи довталаби асосӣ нашр мешаванд. Яъне то имрӯз довталаби асосӣ ҳамлагари бошгоҳи “ПСЖ” Усман Дембеле гуфта мешуд, вале ҳоло ҳамчун довталаби рақами як аз футболбози испанӣ ва ҳамзамон ҳамлагари дастаи “Барселона” Ламин Ямал ном бурда мешавад.

Ҳамчунин, дар шабакаҳои иҷтимоӣ баҳсҳо атрофи арзиши эҳтимолии “Тӯби тиллоӣ” сар задаанд. Бинобар иттилои сомонаи Dinamo.kiev “Тӯби тиллоӣ” аз тилло нест. Он ҳафт килограм вазн дошта, тақрибан 3 ҳазор евро арзиш дорад.

Ёдовар мешавем, ки ҳамаи довталабони ҷоизаи “Тӯби тиллоӣ” дар соли 2025 инҳо мебошанд: Нуну Мендеш, Ашраф Ҳакими, Жоау Невеш, Фабиан Руис, Витиня, Хвича Кварацхелия, Усман Дембеле, Дезире Дуэ (“ПСЖ”), Алексис Макалистер, Моҳаммед Салаҳ, Вирджил ван Дейк, Флориан Виртс (“Ливерпул”), Педри, Рафиня, Ламин Ямал, Роберт Левандовский (“Барселона”), Ҷуд Беллингем, Килиан Мбаппе, Винисиус Жуниор (“Реал Мадрид”), Виктор Ҷокерес, Деклан Райс (“Арсенал”), Ҳарри Кейн, Майкл Олисе (“Бавария”), Дензел Дюмфрис, Лаутаро Мартинес (“Интер”), Серу Гирасси (“Боруссия”), Ҷанлуиҷи Доннарумма, Эрлинг Холанд (“Манчестер Сити”), Коул Палмер (“Челси”) ва Скотт Мактоминей (“Наполи”).

Dialog.tj