Президенти Иёлоти Муттаҳидаи Амрико Доналд Трамп дар шабакаи иҷтимоии “Truth Social” аз Толибон хост, ки Пойгоҳи ҳавоии Багромро дар ихтиёри Амрико гузоранд. Ӯ ҳушдор дод, ки “агар Афғонистон Пойгоҳи ҳавоии Багромро ба Амрико- кишваре, ки онро сохтааст, бар нагардонад, ҳодисаҳои бад рӯй хоҳад дод.

Доналд Трамп рӯзи панҷшанбе дар нишасти хабарии муштарак бо Кир Стармер, Сарвазири Британия эълон кард, ки Амрико барои бозпас гирифтани пойгоҳи Багром талош мекунад. Ӯ гуфт: “Онҳо чизҳое аз мо мехоҳанд, мо ҳам аз онҳо пойгоҳро мехоҳем”.

Пойгоҳи Багром, ки дар соли 2021 бузургтарин пойгоҳи низомии Иёлоти Муттаҳидаи Амрико дар Афғонистон ба шумор мерафт баъд аз хуруҷи неруҳои ин кишвар ба дасти Толибон афтид.

Доналд Трамп борҳо аз Ҷо Байден, Президенти собиқи Амрико барои хуруҷи пур аз ошӯб ва номуназзами соли 2021 аз Афғонистон интиқод карда, гуфтааст, ки ин иқдом боис  шуд, то силоҳу таҷҳизоти низомии Амрико, аз ҷумла пойгоҳи Багром ба дасти Толибон афтад.

Дар идомаи хостаи бозпасгирии пойгоҳи Багром Доналд Трамп дар нишасти хабарӣ дар шаҳри Лондон гуфт: “Яке аз сабабҳое, ки мо мехоҳем он пойгоҳро бозпас гирем, ин аст, ки тавре медонед, он ҳамагӣ як соат дуртар аз ҷое қарор дорад, ки Чин силоҳҳои атомии худро месозад. Бисёр чизҳо дар ҷараён аст, аммо ман воқеан аз он ки ин масъала то ҳол ҳал нашудааст, хеле ноумедам”.

“Мо онро бепул аз даст додем. Ҳоло талош дорем, онро бозпас гирем”- гуфт Доналд Трамп.

Президенти Амрико ҳамчунин, рӯзи ҷумъа гуфт, ки бо Толибон барои гирифтани пойгоҳи Багром дар ҳоли гуфтугӯ аст. Доналд Трмп дар Қасри Сафед ба хабарнигорон гуфт: “Мо ҳаргиз набояд онро вогузор мекардем”.

Рӯзномаи “Wall Street Journal” ба нақл аз мақомоти амрикоӣ хабар дод, ки ҳукумати Доналд Трамп бо Толибон музокирот дорад, то заминаи бозгашти ҳузури маҳдуди низомии Амрико дар пойгоҳи Багромро фароҳам кунад.

Одам Буҳлер, ки чанде пеш бо Зулмай Халилзод ба Афғонистон сафар намуда буд, масъулияти асосии ин музокиротро бар уҳда дорад.

Зулмай Халилзод гуфтааст, ки имкони истифодаи Пойгоҳи ҳавоии Багром барои амалиёти зиддитеррористии Амрико вуҷуд дорад. Бо ин ҳол, ӯ расидан ба ин ҳадафро ба ҳалли масъалаи гаравгонҳо дар миёни Амрико ва Толибон вобаста донистааст.

Dialog.tj