Шурои Иттиҳоди Аврупо нақшаи тадриҷии лағви барномаи қабули паноҳандагони украиниро қабул кард. Бар асоси ин нақша, баъди бозгашти субот дар Украина марҳила ба марҳила нақшаи лағви қабули паноҳандагон қабул карда хоҳад шуд. Нақша фарогири огоҳ кардани шаҳрвандон ва мубодилаи иттилоот дар миёни кишварҳои узви Иттиҳоди Аврупо ва Украинаро дар бар мегирад.

Вазири муҳоҷирати Дания Кааре Дибвад Бек изҳор дошт, ки ҳамбастагии Иттиҳоди Аврупо бо Украина ҳифз мешавд. Ӯ афзуд, муҳим аст, ки барои бозгашти украиниҳо ба ватан омодагӣ гирифта шавад ва ин кор тадриҷан сурат хоҳад гирифт, то мардум битавонанд ба осонӣ ба хонаҳояшон баргашта, дар ҷомеаҳои худ маскун шаванд.

Кишварҳои Иттиҳоди Аврупо ба шаҳрвандони Украина иҷозатномаи миллии иқомат барои кор, таҳсил ё оила медиҳанд ва ҳамчунин, имкони пешниҳоди дархост барои мақомҳои дигар, аз ҷумла барои шуғлҳои баландихтисосро фароҳам месозанд. Истифодаи ҳамзамони ин мақомҳо бо ҳимояи муваққатӣ имконпазир мебошад.

Барои ҳимоят аз раванди бозгашт сафарҳои шиносоӣ ва барномаҳои бозгашти ихтиёрӣ пешбинӣ шудаанд, ки дар доираи онҳо ҳуқуқҳои ҳимояи муваққатӣ, ба мисли дастрасӣ ба манзил, ёрии тиббӣ ва таҳсил ҳифз мешавад.

Шаҳрвандони Украина оид ба тағйири мақоми ҳуқуқӣ, ҳифзи ҳуқуқҳои худ ва ёрӣ дар вақти бозгашт иттилоъ мегиранд. Барои ин системаҳои иттилоотӣ ва Unity Hubs - маркази дастгирӣ, ки дар корҳои ҳуҷҷатгузорӣ кумак карда, оид ба шуғл ҳам дар Украина ва ҳам дар кишвари иқомат маслиҳатҳо медиҳанд, истифода мешаванд.

Аз моҳи марти соли 2022 Иттиҳоди Аврупо беш аз 4 миллион шаҳрванди Украинаро пазируфт. Онҳое, ки бинобар идомаи ҷанг наметавонанд баргарданд, то 4 марти соли 2027 зери ҳимояи муваққатӣ иқомат хоҳанд дошт. Системаи ҳимояи муваққатӣ сарбории хадамоти миллиро осон мекунад, зеро он аз муроҷиати инфиродӣ барои паноҳандагӣ бениёз мебошад.

Dialog.tj