Вазири корҳои хориҷии ҳукумати гурӯҳи террористии Толибон аз Ӯзбекистон ва Тоҷикистон хост, ки чархболҳои низомии артиши собиқи Афғонистонро баргардонанд. Ин чархболҳо дар моҳи августи соли 2021 дар пайи суқути ҳукумати Ашраф Ғанӣ аз Афғонистон ба Тоҷикистон ва Ӯзбикистон интиқол ёфта буданд.

Амирхон Муттақӣ, вазири корҳои хориҷии гурӯҳи террористии Толибон дар суҳбат бо намояндагони ташкилотҳои байналмилал дар шаҳри Кобул гуфт, “мо аз он кишварҳое, ки чор сол қабл дар пайи рӯйдодҳои сиёсӣ қисме аз чархболҳои моро гирифта, ба давлатҳои ҳамсоя супурдаанд, хоҳиш дорем, онҳоро ба мардуми Афғонистон баргардонанд, то дар самти ёриҳои таъҷилӣ истифода шаванд”.

Ӯ, ҳамчунин, ба таҳримҳои байналмилалӣ ишора намуда, гуфт, маҳдудиятҳои бонкӣ интиқоли маблағҳои афғонистониҳои дар хориҷ бударо, ки барои зарардидагони заминларза фиристодаанд,  душвор мекунад.

Рӯзи 8-уми сентябр телевизиони “Афғонистон интернешнл” бо такя ба сарчашмаҳои худ иттилоъ дода буд, ки Ӯзбекистон дар рӯзҳои наздик 57 чархболи низомиеро, ки соли 2021 аз Афғонистон хориҷ шуда буд, бармегардонад. Сухангӯи гурӯҳи террористиии Толибон Забеҳуллоҳ Муҷоҳид чанде қабл гуфта буд, ки Ӯзбекистон ба боз гардонидани техника розӣ шудааст.

Ӯ гуфтааст, ки “ин иқдом дар эҳёи иқтидори ҳавоии Афғонистон ва таҳкими робитаҳо бо кишварҳои ҳамсоя нақши муҳим хоҳад дошт”.

Пас аз садо додани ин изҳорот сухангӯи Вазорати корҳои хориҷии Ӯзбекистон Аҳрор Бурҳонов дар суҳбат бо нашрияи “Газета.Уз” ин хабарро рад намуда, гуфт: “Хабарҳои нашршуда воқеият надоранд. Мавқеи Ӯзбекистон тағйир накардааст ва ин гуна ахбор, дурӯғ аст”.

Dialog.tj