Дар шаҳри Душанбе намояндагони хоси Ҷумҳурии Исломии Покистон, Федератсияи Русия, Ҷумҳурии Исломии Эрон ва Ҷумҳурии мардумии Чин дар як нишасти чорҷониба дар хусуси вазъияти Афғонистон роҳҳои ҳамкорӣ бо мақомоти Толибон, ҳимоят аз ниёзҳои башардӯстона ва таҳдидҳои террористӣ гуфтугӯ кардаанд.

Муҳаммад Содиқ, намояндаи хоси Покистон дар умури Афғонистон дар саҳифаи худ дар шабакаи иҷтимоии “Х” навишт, ки ширкаткунандагони ин нишаст дар бораи нигарониҳо ва хостаҳои муштарак дар мавриди Афғонистон дар хусуси “робитаи натиҷаовар бо мақомҳои Толибон, ҳимоят аз ниёзҳои башардӯстона ва муқобила бо таҳдиди ҷиддии гурӯҳҳои мухталифи террористии вуҷуддошта дар Афғонистон” ба созиш расиданд.

Бо гузашти чаҳор соли ба сари қудрат омадани Толибон ҷомеаи байналмилалӣ, аз ҷумла кишварҳо дар бораи таомул бо ин кишвар ихтилофи назар доранд. Бо вуҷуди ин ки бархе кишварҳо гурӯҳи Толибонро ба расмият шинохтаанд, аммо созмонҳои байналмилалӣ, аз ҷумла Созмони Милали Муттаҳид ин гурӯҳро расман эътироф накардааст.

Бо ба қудрат расидани Толибон Афғонистон ба мушкилоти ҷиддии иқтисодӣ, сиёсӣ ва иҷтимоӣ рӯ ба рӯ гардид. Маҳдудиятҳои вобаста ба ҳукумати Толибон, буҳронҳои иқтисодӣ ва ниёзҳои фарогири башардӯстона сабаб шуданд, ки кишварҳои минтақа ва берун аз он, дар пайи роҳҳои ҳамкорӣ ва муколама бо ҳукумати ҷадиди Кобул бошанд.

Dialog.tj