Дар ноҳияи Нуробод бунёди бузургтарин пули мошингузар дар миқёси Ҷумҳурии Тоҷикистон оғоз шудааст. Пул 920 метр дарозӣ ва 15 метр паҳноӣ дошта, дар давоми ду соли оянда бунёд хоҳад шуд. Ин иншоот ду соҳили дарёи Сурхобро ба ҳам мепайвандад ва барои рушди иқтисодии водии Рашт аҳамияти хоса хоҳад дошт.

Ба иттилои мақомоти расмӣ пули нав на фақат ду соҳили обанбори Роғунро ба ҳам мепайвандад, балки барои истифодаи васеи имкониятҳои саноативу сайёҳӣ низ шароити мусоид фароҳам мекунад.

Масъулон мегӯянд, ки ин иқдом яке аз ташаббусҳои муҳимми Президенти кишвар Эмомалӣ Раҳмон дар самти баромадан аз бунбасти коммуникатсионӣ аст.

Пул дар доираи марҳилаи сеюми Лоиҳаи роҳи Оби гарм - Нуробод бунёд мешавад ва посухгӯ ба меъёрҳои байналмилалии роҳсозӣ хоҳад буд. Барои асосноккунии техникӣ ва тарҳрезии он муҳандисони тоҷик ва мутахассисони хориҷӣ ҷалб шудаанд.

Ёдовар мешавем, ки 26-уми августи соли равон дар ҷараёни сафари корӣ ба ноҳияи Нуробод Сарвари кишвар бо лоиҳаи бунёди пул шинос шуда буданд. Ҳамзамон бо ширкати Сарвари давлат бунёди роҳи нави Оби гарм-Нуробод оғоз ёфта буд.

Бар асоси иттилоъ, дарозии роҳи мазкур 75 километр буда, паҳноии стандартии он 12 метрро ташкил медиҳад. Ин роҳ пойтахтро бо ноҳияҳои Нуробод, Рашт, Сангвор, Тоҷикобод ва Лахш мепайвандад ва барои афзоиши робитаҳои иқтисодиву тиҷоратӣ, аз ҷумла бо Қирғизистон ва дигар кишварҳои минтақа замина фароҳам месозад.

Dialog.tj