Эмомалӣ Раҳмон, Президенти Ҷумҳурии Тоҷикистон дар чорабиние, ки ба ифтихори 30-солагии таъсисёбии Гвардияи миллӣ  ва дар арафаи 34 –солагии Истиқлоли давлатии Тоҷикистон баргузор шуд, ширкат ва суханронӣ намуданд.

Дар ибтидо Сарвари кишвар ҳамаи хизматчиёни ҳарбӣ, аз ҷумла собиқадорони Гвардияи миллиро бо санаи таъсисёбии ин сохтори низомӣ самимона табрик намуданд.

“Ба ҳамаи шумо саломатӣ ва дар иҷрои масъулияти пуршарафи касбӣ, яъне ҳимояи амнияту оромии ҷомеа, ҳифзи дастовардҳои истиқлол ва манфиатҳои давлату миллат муваффақият ва барори кор орзу менамоям”- таъкид намуданд сарвари давлат.

Президенти кишвар таъкид намуданд, ки Гвардияи миллӣ воҳиди махсуси дорои иқтидору имкониятҳои муосир ва омодабошии баланд буда, дар ташаккули низоми дифоии кишвар нақши муҳим дорад.

Сарвари кишвар таъкид намуданд, ки Гвардияи миллӣ бо ҳадафи ҳимояи истиқлолу озодӣ, тамомияти арзии кишвар, ширкат дар муҳофизати иншооти муҳимми давлатӣ, тартиботи ҷамъиятӣ таъсис дода шудааст.

“Ҳайати шахсии ин ниҳоди ҳарбӣ аз рӯзҳои аввали таъсисёбии худ дар баробари дигар сохторҳои низомӣ ва мақомоти ҳифзи ҳуқуқи мамлакат роҳи хеле душвору сангин, вале пуршарафро сипарӣ карда, номи пурифтихори гвардиячиро бо ҷасорату ҷавонмардӣ ва хизмати содиқона ба давлат, Ватан ва халқи Тоҷикистон ҳифз намуд” – таъкид намуданд сарвари кишвар.

Сарвари кишвар таъкид намуданд, ки афсарону сарбозони Гвардия то ба имрӯз вазифаҳои касбии худро ҳамчун кафили суботу оромии ҷомеа сарбаландона иҷро мекунанд.

Dialog.tj