Донишмандони Академияи миллии илмҳои Ҷумҳурии Тоҷикистон дар доираи як лоиҳаи муштараки илмӣ, ки аз ҷониби Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин ҳимоят мешавад, доир ба ду навъи тухмии ҷав дар шароити душвор таҳқиқоти илмӣ мегузаронанд.

Дар вақти сафари корӣ пажӯҳишгарони тоҷик аз Донишкадаи савдо ва технологияҳои нави шаҳри Ганҷжоу ва ҳамчунин, Донишкадаи аграрӣ -инженерии вилояти Гансуи Чин боздид намуданд. Олимони тоҷик бо озмоишгоҳҳои муосир, усулҳои таҳлилии намунаҳои наботот ва технологияҳои баланд бардоштани ҳосилнокии зироатҳо дар шароити хушкӣ шинос шуданд.

“Таваҷҷуҳи хоса ба корҳои илмӣ-тадқиқотӣ бо навъҳои ҷав равона гардид. Мо тухмии ду навъро барои омӯзиш ва мутобиқсозӣ ба шароити Тоҷикистон овардем” – таъкид намуд мудири лабараторияи генетика ва селексияи набототи Институти ботаника, физиология ва генетикаи набототи АМИТ, доктори илмҳои кишоварзӣ, профессор Қурбоналӣ Партоев.

Афзун бар ин, донишмандони тоҷик бо усулҳои парвариши катошка ва зироатҳои лӯбиёгӣ бо истифода аз обёрии қатрагӣ дар заминҳои лалмӣ ошно шуданд. Чунин усулҳо дар минтақаҳои хушки Чин имкони ба даст овардани ҳосили баландро фароҳам меоранд. Масалан, то 45 тонна картошка аз як гектар дар вақти истифодаи гидропоника, аэропоника ва кишт дар хок ба даст овардан мумкин аст.

Дар доираи ин сафар ёддошти тавоҳум дар бораи ҳамкориҳои илмӣ миёни Маркази мусоидат ба рушди илм ва технологияҳои вилояти Гансу ва Маркази рушди инноватсионии илм ва технологияҳои нави АМИТ ба имзо расид. Ин санад ба таҳкими ҳамкориҳои дуҷонибаи илмӣ ва мубодилаи таҷриба дар соҳаи таҳқиқоти аграрӣ нигаронида шудааст.

Dialog.tj