Дар пайи ин ки Толибон чопи акси занон дар шиносномаҳоро манъ карданд, корзоре дар шабакаи иҷтимоии фейсбук роҳандозӣ шуд ва бар асоси он акси беш аз 10 ҳамсари роҳбарони Толибонро нашр карданд.

Ин иқдом аз ҷониби корманди собиқи Хадамоти иктишофии хориҷии Амрико анҷом дода шуд. Ӯ бо нашри акси ҳамсари роҳбарони Толибон гуфт, ки бо ин кор мехоҳад дар муқобили маҳдудиятҳои ин гурӯҳи ифротӣ мубориза кунад.

Нашри чеҳра ё рӯйи ҳамсарони роҳбарони Толибон, ки башиддат қонунҳои сахтгиронаро бар зидди занон ҷорӣ кардаанд, дар шабакаҳои иҷтимоӣ ба вокуниши мусбати корбарон рӯ ба рӯ шуд.

Бархе корбарони шабакаҳои иҷтимоӣ бо танз навиштанд, ки акнун Толибон акси ҳамсарони худро дар расонаҳо мебинанд ва чеҳраҳои занони онҳо ҷаҳонӣ шуд.

Сара Адамс, корманди собиқи Созмони иктишофии Амрико акси ҳамсарони роҳбарони Толибонро аз шиносномаҳояшон ба даст оварда ва дар он рӯйи комили онҳо намоён мешавад. Ӯ бо нашри 10 акси ҳамсари роҳбарони Толибон гуфтааст, ки аксҳои бештареро нашр хоҳад кард.

Сара Адамс гуфт, ки аксҳо аз рӯи шиносномаҳои дипломатии ҳамсарони мақомоти Толибон ба даст омада ва ҳамроҳ бо вазифаҳои шавҳаронашон нашр шуд. Бар асоси иттилоъ аксҳои ҳамсарони намояндагони Толибон дар сафорат ва консулгариҳои Маскав, Зоҳидон, Қандаҳор, Машҳад, Бишкек, Дубай ва Исломобод нашр шудааст.

Ин иқлом пас аз ҳукми нави роҳбари Толибон анҷом шуд, ки дастур дод, дигар акси занон дар шиносномаҳо ҷо дода нашавад. Ба дунболи ин фармони роҳбари Толибон идораи сабти асноди шаҳрвандии Афғонистон гуфт, ки нашри акси занон дар шиносномаҳо ҳатмӣ нест.

Сара Адамс, аз фармони нави роҳбари Толибон интиқод намуда, навишт, ки “Занони мақомоти Толиб бо шиносномаҳои дипломатӣ ва аксҳои худ ба хориҷ сафар мекунанд, дар ҳоле ки акси духтарони афғон аз санадҳои ҳувияти онҳо ҳазф мешавад”.

Dialog.tj