Эмомалӣ Раҳмон, Президенти Ҷумҳурии Тоҷикистон дар ҳошияи нишасти сарони кишварҳои узви Созмони ҳамкории Шанхай бо Ҷин Литсюн, Президенти Бонки осиёии сармоягузориҳои инфрасохторӣ (БОСИ) мулоқот карда, ҳамкориҳои дуҷонибаро баррасӣ намуданд.

Дар ҷараёни мулоқот Сарвари давлат саҳми Бонки осиёии сармоягузориҳои инфрасохториро дар рушди инфрасохтори устувор ва таҳкими пайвандҳои иқтисодии кишварҳои минтақа муҳим арзёбӣ карданд. Сарвари давлат таъкид намуданд, ки дар солҳои ахир Тоҷикистон ба яке аз шарикони фаъоли бонки зикршуда табдил ёфтааст.

Бар асоси иттилоъ, айни ҳол Бонки осиёии сармоягузориҳои инфрасохторӣ (БОСИ) дар чор лоиҳаи сармоягузорӣ дар Тоҷикистон бо маблағи умумии беш аз 430 миллион доллар ширкат дорад. Аз ҷумла, саҳми назарраси Бонк дар сохтмони Неругоҳи барқи обии Роғун ва пули бузурги мошингарди ноҳияи Нуробод зикр шуд. Қарор аст маблағгузории Бонк ба лоиҳаи Роғун то 500 миллион доллар афзоиш ёбад.

Ҷонибҳо ҳамчунин, имконоти густариши ҳамкориро дар соҳаи “энергетикаи сабз” баррасӣ намуданд. Барномаҳо оид ба сохтмон ва навсозии неругоҳи барқӣ, истифодаи дастгоҳҳои офтобию бодӣ ва татбиқи лоиҳаҳои ҳифзи муҳити зист дар меҳвари гуфтугӯ қарор доштанд.

Мавзуи дигаре, ки мавриди баррасии ду ҷониб қарор гирифт, дастгирии молиявӣ барои беҳтар кардани идоракунии захираҳои об, коҳиш додани хатарҳои селу ярч ва ҷорӣ намудани технологияҳои пешрафтаи мониторинг буд. Ба рушди ҳамгироии нақлиётӣ, навсозии инфрасохтори каммуналӣ ва ҷалби сармояи хусусӣ низ таваҷҷуҳи ҷиддӣ зоҳир гардид.

Ҳарду ҷониб таъкид карданд, ки рушд ва тавсеаи робитаҳо дар шаклҳои инноватсионии маблағгузорӣ ва усулҳои нави молиявӣ ояндаи рӯшани ҳамкории Тоҷикистон бо Бонки осиёии сармоягузориҳои инфрасохторӣ мебошад.

Dialog.tj