Се кишвари аврупоии узви Созишномаи атомӣ Олмон, Британия ва Фаронса рӯзи панҷшанбе бо ирсоли нома ба аъзои Шурои амнияти Созмони Милали Муттаҳид эълон намуданд, ки раванди “механизми моша” ё “снап бак” барои иҷро намудани таҳримҳои байналмилалӣ бар зидди Эронро фаъол мекунанд.

Ин хабар аввал аз ҷониби “Садои Олмон” ва баъдан аз ҷониби “Рейтерз” тасдиқ шуд. Аврупо бо ин иқдом мехоҳад таҳримҳои лағвшудаи Созмони Милали Муттаҳид дубора барқарор шавад. Дар соли 2015 таҳримҳои умумии Созмони Милали Муттаҳид бо имзои созишномаи атомӣ миёни Амрико ва Эрон лағв шуда буд.

“Мо мутааҳидем, ки бо истифода аз ҳамаи абзорҳои дипломатӣ бовар ҳосил кунем, ки Эрон  ҳаргиз силоҳи атомӣ тавлид намекунад. Қарори фаъол кардани маханизми моша низ дар ҳамин чорчӯб гирифта шуд”- омадааст дар изҳороти се кишвари аврупоӣ.

Мақомоти аврупоӣ гуфтаанд, ки дар музокироти ахири Женева талош намуданд, ки фаъол кардани механизми мошаро ба таъхир андозанд, вале “уҳдадориҳои мушаххас ва кофӣ аз сӯи Эрон дарёфт нашуд”.

Вазорати корҳои хориҷии Эрон бо нашри изҳорот гуфт, ки посухи Эрон ба ин иқдом сахт хоҳад буд. Онҳо афзуданд, ки кишварҳои аврупоӣ бо сабаби иҷро нашудани уҳдадориҳои иқтисодӣ ва сукут дар баробари хуруҷи Амрико аз Созишномаи ҳастаӣ аслан асоси ҳуқуқӣ ва ахлоқӣ барои истифода аз ин механизмро надоранд.

Маханизми моша равандест, ки дар қатъномаи 2231-и Шурои амният сабт шудааст ва шарти он ин аст, ки ҳар як кишвари узви созишнома имконият дорад, дар сурати “иҷро накардани уҳдадорӣ” аз ҷониби як кишвари узви созишнома,  таҳримҳои байналмилалро ба таври худкор дубора барқарор кунад. Таҳлилгарон мегӯянд, истифода аз ин механимз дар ҳолати кунунӣ ихтилофоти сиёсиро шиддат мебахшад.

Dialog.tj