Як мақоми полиси гурӯҳи террористии Толибон дар вилояти Тахор гуфт, ки 13 нафарро барои навохтани мусиқӣ дар ноҳияи Бангӣ боздошт кардааст.

Ба асоси гузориши расонаҳо боздоштшудагон дар вақти иҷрои мусиқӣ боздошт шудаанд, вале маълум нест, ки бо онҳо чӣ гуна рафтор хоҳанд кард ва чӣ гуна ҷазо хоҳанд дод.

Ин хабар дар ҳолест, ки гурӯҳи Толибон қабл аз бозгашт ба қудрат борҳо аз тағйир ва нишон додани чеҳраи боэътидол сухан гуфта буданд, вале ба гуфтаи нозирон, то кунун ҳич гуна дигаргуние дар сиёсатҳои ин гурӯҳ мушоҳида намешавад.

Гурӯҳи террористии Толибон мусиқиро ҳаром ва яке аз мункарот мешуморанд ва дар солҳои гузашта низ амалҳои ифротӣ бар зидди он анҷом дода буданд. Дар даври аввалини ҳукмронии худ онҳо асбобҳои мусиқиро мешикастанд ва месӯзонданд - иқдоме, ки ҳоло низ идома дорад.

Дар соли гузашта Вазорати амр ба маъруф ва наҳй аз мункари Толибон хабар дода буд, ки беш аз 21 ҳазору 382 асбоби мусиқӣ аз ҳамаи Афғонистон ҷамъоварӣ ва нобуд шудааст.

Ба гуфтаи таҳилгарон ин иқдомҳо нишон медиҳанд, ки бар хилофи ваъдаҳои қаблӣ гурӯҳи террористии Толибон ҳанӯз ҳам сиёсати сахтгиронаи иҷтимоиро идома медиҳанд.

Dialog.tj