Доналд Трамп, Президенти Иёлоти Муттаҳидаи Амрико баъд аз мулоқот бо Владимир Зеленский ва роҳбарони аврупоӣ дар Кохи сафед гуфт, ки бо Владимир Путин, Президенти Русия тамоси телефонӣ дошт ва омодагиҳо барои баргузор шудани нишасти сеҷониба миёни Иёлоти Муттаҳидаи Амрико, Русия ва Украина оғоз шудааст.

Бар асоси гузориши расонаҳо, дар ин мулоқот Владимир Зеленский, Президенти Украина, ҳамчунин, роҳбарони Британия, Фаронса, Олмон, Италия, Финландия, раиси Комиссияи Аврупо ва Дабири кулли НАТО ширкат доштанд. Ба гуфтаи Трамп, онҳо асосан барои замонатҳои амниятӣ барои Украина, ки бо ҳамоҳангии ИМА аз ҷониби кишварҳои аврупоӣ пешниҳод хоҳад шуд, гуфтугӯ намуданд.

“Дар фарҷоми дидорҳо бо роҳбарони аврупоӣ ва Зеленский бо Путин тамос гирифтам ва тартиботи аввалияи нишасти рӯ ба рӯи Путин ва Зеленскийро оғоз намудам. Пас аз он мулоқот, нишасти сеҷониба бо ширкати ман низ доир хоҳад шуд. Ин қадами муҳим ва ибтидоӣ барои ҷангест, ки наздик ба чор сол идома дорад”- гуфт Доналд Трамп.

Президенти Амрико афзуд, ки тасмим дар хусуси ояндаи ҷанг дар Украина шояд дар давоми як ё ду ҳафтаи оянда рӯшан шавад: “Дар ин муддаи кӯтоҳ мушаххас мешавад, ки оё метавонем роҳи ҳал пайдо кунем ё ҷанги харобиовар идома хоҳад кард. Мо тамоми талошро барои поёни ҷанг идома медиҳем”.

Владимир Зеленский низ дар нишасти муштарак афзуд, ки агар мулоқоти рӯ ба рӯ бо Путин доир шавад, имкони расидан ба сулҳ бештар мегардад.

Бархе расонаҳо навиштанд, Доналд Трамп умедвор аст, ки мулоқоти Владимир Зеленский ва Путин дар ҳафтаҳои ахир баргузор хоҳад шуд.

Dialog.tj