Кушта шудани 5 журналисти шабакаи телевизионии “Ал-Ҷазира” дар натиҷаи ҳамлаҳои ҳавоии Исроил бо вокунишҳои шадиди байналмилалӣ рӯ ба рӯ шуд. Вазирони корҳои хориҷии баъзе кишварҳо, мақомоти ниҳодҳои байналмилалӣ ва ҷомеаи ҷаҳонӣ ин амали режими Исроилро маҳкум намуданд.

Тибқи иттилои шабакаи “Ал-Ҷазира”-и Қатар Кая Каллас, масъули сиёсати хориҷии Иттиҳоди Аврупо бо нашри як изҳорот гуфт: “Мо қатли панҷ хабарнигори “Ал-Ҷазира” дар Ғаззаро маҳкум мекунем”.

Ауфер Бронштейн, мушовири Президенти Фаронса низ дар суҳбат бо “Ал-Ҷазира” гафт: “Ҳаёти хабарнигорон бояд ҳамеша ҳифз шавад ва мо ин ҳодисаро ба шиддат маҳкум мекунем”. Ӯ аз Исроил даъват намуд, ки марзҳоро барои фаъолияти озоди хабарнигорон боз кунад.

Як мақоми Британияи Кабир гуфт, ки кушта шудани панҷ хабарнигори “Ал-Ҷазира” ва ҳамлаҳои такрорӣ ба журналистон дар Ғазза “бисёр нигаронкунанда” аст. Вазири корҳои хориҷии Урдун низ дар баёнияи  расмӣ гуфт, ки ин ҳамлаҳоро “ҷинояти ҷангӣ” медонад ва хостори муҳокима ва ба ҷавобгарӣ кашидани омилони он гардид.

Вазири корҳои хориҷии Шветсия низ бо ишора ба вазъи фоҷеабори Ғазза хостори лағви бахши тиҷоратии созишномаи ҳамкорӣ бо Исроил шуд.

Ёдовар мешавем, рӯзи душанбе дар ҳамлаи ҳавоии Исроил ба урдугоҳи журналистон дар ҳудуди бемористони “Ал-Шифо” дар Ғазза, Анас аш-Шариф ва Муҳаммад Қариқа -ду хабарнигор, Иброҳим Зоҳир ва Муъмин Алюва - ду тасвирбардор, Муҳаммад Нуфал – ёвари тасвирбардор ва Муҳаммад ал-Холидӣ кушта шуданд.

Dialog.tj