Масъулони авиатсияи Тоҷикистон ва Туркия рӯзи 7-уми август дар ҷараёни мулоқот масъалаи боз кардани хатсайрҳои нав ва афзоиши парвозҳоро баррасӣ карданд.

Тибқи иттилоъ, Директори Агентии авиатсияи граждании назди Ҳукумати Ҷумҳурии Тоҷикистон Ҳабибулло Назарзода бо Кемал Юсксек, директори генералии маъмурияти авиатсияи граждании Туркия ва намояндагони ширкатҳои ҳавопаймоии «Turkish Airlines», «AnadoluJet» ва «Pegasus Airlines» мулоқот намуд.

Меҳвари асосии гуфтугӯи ҷонибҳо ифтитоҳи хатсайрҳои нав, аз ҷумла Анқара-Душанбе, Анқара-Хуҷанд ва Анталия Душанбе, ҳамчунин, афзоиши шумораи парвозҳо миёни Истанбул ва шаҳри Душанбе буд.

Ҷониби Туркия омодагии худро барои ҳамкорӣ дар бахшҳои амнияти авиатсионӣ, иҷозатномадиҳӣ, рақамикунонии равандҳо ва омӯзиши кадрҳои соҳа, бахусус дар доираи назорати ИКАО дар Тоҷикистон баён кард.

Масъулон гуфтаанд, ки доир шудани чунин мулоқотҳо метавонад ба рушди ҳамкориҳои дуҷониба ва тақвияти соҳаи авиатсияи гражданӣ дар ҳарду кишвар мусоидат намояд.

Dialog.tj