Дар конфронси 6-уми раисони парламентҳои ҷаҳон, ки рӯзи 30-уми июл дар шаҳри Женеваи Швейтсария доир гардид, Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ширкат ва суханронӣ намуд.

Файзалӣ Идизода таъкид намуд, ки иттиҳоди байнипарламентӣ имрӯз ба яке аз механизмҳои муассири ҳалли проблемаҳои глобалӣ ва ташвиқи сулҳ дар ҷаҳон табдил ёфтааст.

“Мо, вакилон дар ин ҷо на фақат барои ҳалли мушкилоти глобалӣ, балки барои пешгирии буҳронҳои сершуморе, ки ҷаҳонро фаро гирифтаанд, ҷамъ омадаем”- зикр намуд Файзалӣ Идизода.

Ӯ таъкид намуд, ки парламентҳои ҷаҳон бояд садоқати худро ба арзишҳои байналмилалӣ ва припсипҳои аз сӯйи ҷомеаи ҷаҳонӣ эътирофшуда таъкид намоянд.

Бар асоси иттилои расмӣ конфронси раисони парламентҳо аз соли 2000-ум ба ин сӯ минбари муҳимми табодули идеяҳо, таҳкими ҳамкориҳои байнипарламентӣ ва тақвияти дипломатияи парламентӣ гардидааст.

Раиси парлумони Тоҷикистон дар идомаи суханронии худ гуфт, ки мақоми қонунгузории кишвар ба воситаи қабули қонунҳо ва тасвиби созишномаҳои байналмилалӣ дар таъмини сулҳу субот, адолат ва пешрафти ҷомеа саҳм мегузорад.

Ширкати Тоҷикистон дар чунин чорабиниҳои сатҳи баланд нишони иродаи он ба ҳамгироӣ, ҳамкории созанда ва ҳимояи манфиатҳои мардум дар сатҳи байналмилалӣ арзёбӣ мешавад.

Dialog.tj