Ҳазорон нафар дар Шотландия ва баъзе аз шаҳрҳои Британияи Кабир дар пасманзари сафари Доналд Трамп ба ин кишвар эътироз намуданд.

Расонаҳои ин кишвар хабар доданд, ки Доналд Трамп бо сафари панҷрӯза вориди Шотландия шуд ва бо сарвазири Британияи Кабир Кир Стармер мулоқот хоҳад кард. Ҳамчунин, ӯ дар поёни соли ҷорӣ сафари дигари расмӣ ба Британияи Кабир анҷом дода, бо шоҳи ин кишвар Чарлес 3 дидор хоҳад кард.

Дар робита ба масъалаи вуруди Доналд Трамп ба Шотландия тазоҳуроти зиёде дар се шаҳри бузурги ин кишвар – Эдинбург, Абердин ва Дамфрис доир гардид. Муқобилини ӯ бо бардоштани шиорҳое чун “Трампро боз доред, Ғаззаро озод кунед” ва “Доналдро хомӯш кунед” эътирози худро баён намуданд.

Тибқи гузориши рӯзномаи шотландии “The National” садҳо нафар дар тазоҳуроти шаҳрҳои Абердин ва Эдинбург ширкат намуданд. Аъзои Ҳизби сабз дар парлумони Шотландия низ дар канори эътирозгарон буданд. Ин рӯзнома дар шумораи рӯзи ҷумъа бо сарлавҳаи “Ҷинояткори маҳкуми амрикоӣ ба Шотландия ворид мешавад” дар расонаҳо сару садои зиёд ба роҳ монд.

Рӯзномаи амрикоии “New York Times” низ бо сарлавҳаи “Трамп дар вақти бозии голф дар Шотландия мавриди истиқболи эътирозгарон қарор гирифт” аз гирдиҳамоии густурда хабар дод.

Бар асоси навиштаи ин рӯзнома, рӯзи шанбе ва ҳамзамон бо ҳузури Доналд Трамп дар майдони голф дар Тернберри садҳо нафар ба кӯчаҳо баромаданд, то ҳузури ӯро маҳкум карда, мухолифати худро бо сиёсати ҳукумати Амрико дар хусуси муҳоҷират дар ҷанг дар Ғазза ва дигар масъалаҳои баҳсбарангез баён кунанд.

Ин рӯзнома ба лаҳзаи ворид шудани Трамп ба фурудгоҳи Шотландия ишора карда, менависад, миёни тазоҳуротгарон нафароне ҳам буданд, ки бо бардоштани шиорҳо ба парвандаҳои ҷанҷолии Трамп ва Ҷеффри Эпштейн, ҷинояткори шаҳвонӣ ишора мекарданд. Барои мисол, як зан шиоре бо 9 тасвири муштарак аз Трамп ва Эпштейн дар даст дошт, ки дар поёнаш навишта шуда буд: “Дӯстон барои ҳамеша”. Зани дигар низ бо шиоре хостори нашри парвандаҳои Эпштейн буд.

Доналд Трамп то кунун дахолаташро дар парвандаҳои Эпштейн рад кардааст. Ӯ рӯзи ҷумъа дар ҷараёни суҳбат бо хабарнигорон гуфт, ки таваҷҷуҳи ӯ ба созишномаҳои тиҷоратӣ равона аст, на ба назарияҳои тавтиа.

Dialog.tj