Имрӯз Президенти кишвар Эмомалӣ Раҳмон дар як қатор ниҳод ва муассисаҳои давлатӣ тағйирот анҷом дода, кадрҳои ҷавон ва корозмударо ба вазифаҳои нав таъйин намуданд.

Бар асоси иттилоъ, ба вазифаҳои муовинони аввали Вазири тандурустӣ ва ҳифзи иҷтимоии аҳолӣ, вазири адлия, вазири кишоварзӣ, ҳамчунин, роҳбарияти Агентии назорати давлатии энергетикӣ ва Муассисаи “Мудирияти минтақаи зериобшавандаи НБО “Роғун” шахсони ҷавону кордон таъйин карданд. Дар чорчӯби ин тағйирот, сардори нави Муассисаи давлатии “Экспедитсияи мубориза бар зидди малах” ва муовини сардори Саридораи бойгонии давлатӣ муайян шуданд.

Сарвари кишвар дар ҷараёни муаррифии кадрҳои нав таъкид карданд, ки хизматчиёни давлатӣ бояд бо руҳияи содиқона, масъулиятшиносӣ ва бо истифода аз имкониятҳои илму техника, аз ҷумла зеҳни сунъӣ, дар самтҳои ҳассос, ба монанди тандурустӣ, таъмини амнияти озуқаворӣ ва истифодаи самараноки захираҳои энергетикӣ фаъол бошанд.

Роҳбари давлат дастур доданд, ки ба тарбияи кадрҳои ҷавон таваҷҷуҳи бештар зоҳир гардад, аз ҷумла бо омӯзиши фанновариҳои нав, забонҳои хориҷӣ ва зиёд намудани ҷаҳонбинии онҳо.

Dialog.tj