Бо наздик шудани соли 2026 эҳтимолан арзиши нархи ҳама намуди визаҳои ғайримуҳоҷиратии Иёлоти Муттаҳидаи Амрико боло меравад, ки ин ҷомеаи ҷаҳониро ба ташвиш овардааст.

Тибқи иттилоъ, дар сурати тасвиби ниҳоии як қонуни нав бо номи расмии H.R.1 ё One Big Beautiful Bill эҳтимол меравад, ки ба ҳамаи навъҳои виза, аз ҷумла туристӣ (В1, В2), донишҷӯӣ (F, J) ва корӣ (H, O ва дигар навъҳо) нархи нави ҳатмӣ бо номи Visa Integrity Fee ба маблағи 250 доллар илова карда шавад.

Ин маблағ ба боҷи ҳозираи консулӣ, ки 185 доллар аст, ҳамроҳ мешавад ва арзиши умумии гирифтани визаи амрикоӣ метавонад то ба 435 доллар афзоиш ёбад.

Бар асоси иттилои пешакӣ, боҷи Integrity Fee ғайриқобили лағв ё тахфиф аст ва фақат дар сурате баргардонида мешавад, ки довталаб ҳамаи шартҳои истифодабарии визаи худро дақиқан риоя карда бошад. Аммо механизмҳои дақиқи баррасии риояи ин шартҳо то ҳол рӯшан нест.

Дар ин бора сафорати Амрико дар Қазоқистон ба расонаҳои иттилоъ дода, афзудааст: “4-уми июл Президент Трамп "One Big Beautiful Bill"-ро имзо кард. Мо ба зудӣ иттилои бештар дар бораи татбиқ ва таъсири ин қонун ба кори департаменти давлатии Иёлоти Муттаҳидаи Амрико нашр хоҳем кард. То вақти эълони расмӣ, ҳамаи расмиёти қонунӣ ва хароҷотҳо бе тағйир боқӣ мемонад”.

Дипломатҳои амрикоӣ таъкид кардаанд, ки то замони мавриди амал қарор гирифтани қонуни нав арзиши визаҳо бе тағйир боқӣ мемонанд. Онҳо таъкид намудаанд, ки ҳанӯз тағйирот расман амалӣ нашудааст.

Тибқи гуфтаи мақомоти амрикоӣ агар қонун амалан татбиқ шавад, барвақттар аз соли 2026 ба иҷро хоҳад даромад. Фақат эълони расмӣ аз департаменти давлатӣ метавонад тағйироти навро мавриди амал қарор диҳад.

 Dialog.tj