Дар ҳоле, ки музокироти эҳтимолии атомии Эрон бо Иёлоти Муттаҳида дубора дар маркази таваҷҷуҳи байналмилалӣ қарор дорад, мақомоти Исроил аз эҳтимоли гирифтани иҷозаи нав барои ҳамла ба Ҷумҳурии Исломии Эрон аз сӯи ҳукумати Доналд Трамп хабар медиҳанд.

Расонаи “Axios” бо такя ба ду сарчашмаи огоҳ аз музокироти пинҳонӣ навишт, ки дар ҷараёни боздиди сарвазири Исроил Бенямин Нетаняҳу аз Вашингтон масъалаи Барномаи атомии Эрон ва сенарияҳои эҳтимолии ҳамлаҳо мавзӯи асосии гуфтугӯҳо бо президенти Амрико Доналд Трамп хоҳад буд.

Рон Дермер, муовини калони Нетаняҳу гуфтааст, ки баъд аз сафари ахири худ ба Вашингтон бовар дорад, ки ҳукумати Трамп дар шароити муайян ба ҳамлаи дуюм бар зидди Эрон “дастур” хоҳад дод.

Шартҳои эҳтимолии чунин ҳамла метавонад аз кӯшиши Эрон барои берун кардани маводи ғанишуда аз корхонаҳои осебдида дар Фурду, Натанз ва Исфаҳон иборат бошад.

Масъалаи захираҳои ҳассоси Эрон тақрибан 4000 килограмм урани ғанишуда ба сатҳи 60% дар гуфтугӯҳои ахири дипломатии Исроил ва Амрико мавриди баррасӣ қарор гирифтааст. Барои истеҳсоли силоҳи атомӣ бояд то сатҳи 90 фоиз ғанисозӣ шавад.

Исроил ва Амрико бар ин боваранд, ки марказҳои асосии атомии Эрон осеб дидаанд, вале инфрасохтори асосӣ ва маводи радиоктив пурра нобуд нашудаанд. Ҳоло ин мавод, ба гуфтаи манбаъ, дар се нуқтаи асосӣ бо муҳр нигоҳ дошта мешаванд ва зери назорати доимии хадамоти иктишофии ҳар ду кишвар қарор доранд.

Президенти Эрон Масъуд Пизишкиён дар як мусоҳиба бо Такер Карлсон изҳор дошт, ки “муассисаҳо шадидан осеб дидаанд” ва мақомти Эрон ҳанӯз наметавонанд ба муассисаҳо пурра дастрасӣ ёбанд, то сатҳи зарарро арзёбӣ кунанд.

Ин расона менависад, ки Стив Уиткофф, намояндаи хоси Кохи сафед дар умури Ховари Миёна дар рӯзҳои наздик дар Осло бо Аббос Ироқчӣ, вазири корҳои хориҷии Эрон мулоқоти расмӣ анҷом хоҳад дод. Теҳрон низ эҳтимолан ба ин музокирот розӣ аст, ҳарчанд таърихи дақиқ ҳанӯз эълон нашудааст.

Президенти Амрико баъд аз ҷанги 12-рӯзаи Эрон ва Исроил ду бор эҳтимоли ҳамлаи дубора ба Эронро матраҳ кард ва ҳамчунин, таъкид ҳам кард, ки “агар созиш шавад, аз ҳамла пешгирӣ хоҳад шуд”.

Dialog.tj