Эмомалӣ Раҳмон, президенти Ҷумҳурии Тоҷикистон дар ҳамоиши 17-уми Созмони ҳамкории иқтисодӣ, ки дар Ҷумҳурии Озарбойҷон доир шуд, иштирок ва суханронӣ намуданд. Сарвари кишвар дар суханронии худ гуфтанд, ки Тоҷикистон ҳамкории тиҷоратию иқтисодӣ бо кишварҳои аъзои ЭКО-ро самти афзалиятноки сиёсати хориҷии худ меҳисобад.

Эмомалӣ Раҳмон рушди ҳамкорӣ дар бахшҳои тиҷорат, нақлиёт, энергетика, саноат ва кишоварзиро шарти муҳимми рушди устувори минтақа номиданд. Ба гуфтаи онҳо, истифодаи самараноки имкониятҳои мавҷуда фақат бо таҳияи санади нави ҳамкорӣ имконпазир хоҳад буд.

Сарвари давлат афзуданд, ки новобаста ба буҳронҳои ҷаҳонӣ иқтисоди кишварҳои аъзои ЭКО тамоюли мусбат дорад. Президенти Тоҷикистон иттилоъ доданд, ки ҳаҷми савдои кишвар бо аъзои ЭКО дар соли 2024 ба 33% тиҷорати хориҷии Тоҷикистон расида, нисбат ба соли гузашта 18% афзудааст.

Роҳбари давлат Эмомалӣ Раҳмон рушди долонҳои нақлиётӣ, бартараф кардани меонеаҳои транзитӣ ва рақамикунонии ҳуҷҷатҳоро аз роҳҳои асосии тақвияти ҳамкорӣ хонанд.

Дар бахши энергетика, Президент  ба истифодаи васеи энергияи сабз ва татбиқи лоиҳаи “CASA- 1000” таъкид карданд. Ҳамчунин, ба зарурати дастгирии молиявии таъсиси корхонаҳои муштараки хурду миёна ишора намуда, ин иқдомро роҳи асосии таъсиси ҷойҳои корӣ ва рушди истеҳсолот донистанд.

Сарвари давлат таъмини амнияти озуқаворӣ, рушди агротехнология ва таъсиси маҷмааҳои агросаноатиро аз самтҳои муҳимми ҳамкорӣ хонданд. Президенти кишвар дар бораи хатарҳои афзояндаи тағйиёбии иқлим ва офатҳои табиӣ ҳушдор дода, андешидани тадбирҳои муштаракро зарур шумурданд. Ҳамчунин, ба густариши ҳамкориҳои фарҳангӣ, илмӣ, тандурустӣ ва сайёҳӣ таъкид намуда, зарурати тақвияти робитаҳои мардумиро ба миён гузоштанд.

Бо ишора ба вазъи буҳронии Ховари Миёна Сарвари давлат аз роҳҳои сиёсиву дипломатӣ ҳамчун роҳи ягонаи ҳал ва барқарории сулҳи пойдор ҷонибдорӣ намуданд.

Dialog.tj