Сухангӯи Пентагон дар бораи қарори Доналд Трамп дар мавриди қатъи ирсоли бархе аслиҳа ба Украина изҳор дошт, ки ин иқдом як бахши кӯшиши фарогир дар сатҳи ҷаҳонӣ мебошад: “Мо наметавонем ба тамоми ҷаҳон силоҳ ирсол кунем ва бояд дар фикри Амрико бошем”.

Мақомоти Пенгатон рӯзи чоршанбе эълон карданд, ки қарори Доналд Трамп барои қатъи ирсоли як қисми аслиҳа ба Украина бахше аз як кӯшиши фарогир дар масъалаи ирсоли ҷаҳонии аслиҳаҳои Амрико мебошад. Гуфта мешавад, ин бозбинӣ метавонад ба қатъи комил ё қисмани ирсоли муҳимот ба Украина боис шавад, ки натиҷаи ниҳоии он ба таҳқиқоти Вазорати дифоъ вобаста хоҳад буд.

Мақомоти Вазорати дифои Амрико рӯзи сешанбе эълон карда буданд, ки ҳукумати Вашингтон ба хотири нигаронӣ аз кам шудани захираҳои аслиҳаҳои Амрико, ирсоли системаи дифои зиддиҳавоии “Патриот”, тири артиллерия ва мушакҳое, ки неруҳои ҳавоии Украина бо ҳавопаймоҳои ҷангии F-16-и амрикоӣ партоб мекунанд, мутаваққиф намудааст.

Шон Парнелл, сухангӯи Пентагон рӯзи гузашта дар нишасти матбуотӣ шарҳ дод, ин бозбинӣ тамоми кишварҳое, ки Амрико ба онҳо силоҳ ирсол мекунад, дар бар мегирад ва фақат ба Украина маҳдуд намешавад. Ӯ дар идома аз посух додан ба суоли он ки оё Амрико ирсоли аслиҳа ба кишварҳои дигарро низ қатъ кардааст ё не, худдорӣ карда, афзуд: “Мо наметавонем ба ҳамаи кишварҳои ҷаҳон аслиҳа диҳем. Мо бояд дар фикри Амрико ва ҳимояи ватану неруҳоямон дар саросари ҷаҳон бошем”.