Ҳомиёни ҳуқуқ дар Амрико мегӯянд, ки баъди номзади интихоботи шаҳрдорӣ шудани Заҳрон Мамдании мусалмон фақат дар як рӯз тақрибан 6, 200 паёмҳои онлайнии дорои таҳқир ва хушунати исломситезонаро сабт кардаанд.

Дар ин ҳафта баъд аз пирӯзии Заҳрон Мамдании мусалмон ба ҳайси номзад ба интихоботи раиси шаҳри Ню-Йорк дар интихоботи ибтидоии демократҳо паёмҳои нафратбори зидди мусалмонон бар зидди ӯ дар шабакаҳои иҷтимоӣ якбора афзоиш ёфтаанд.

Шуъбаи гурӯҳи ҳомии Шурои робитаҳои амрикоӣ-исломӣ, ки чунин ҳолатҳоро сабт мекунад, фақат дар рӯзи баъди интихобот ҳадди ақал 127 гузориши вобаста ба таҳдидҳои хушунатомез бар зидди Заҳрон Мамданӣ ва маъракаи интихоботии ӯро ба қайд гирифтааст. Ин ниҳод гуфт, ки ин рақам панҷ маротиба бештар аз гузоришҳои рӯзонаест, ки дар аввали моҳи ҷорӣ сабт мешуд. Ниҳоди зикршуда дар маҷмуъ тақрибан 6,200 паёми онлайниро мушаххас кардааст, ки дар он ба шакле таҳқир ё душманӣ нисбат ба ислом сабт шудааст.

Заҳрон Мамданӣ худро сотсиалисти демократ мешуморад. Ӯ намояндаи 33-солаи қонунгузории иёлати Ню-Йорк аст. Вай рӯзи сешанбе баъди маълум шудани натиҷаҳои интихоботи дарунҳизбӣ пирӯзиашро эълон кард. Рақиби ӯ дар интихоботи дарунҳизбӣ дар Ҳизби демократи Амрико Эндрю Куомо, губернатори пешини ин иёлат буд.

Заҳрон Мамданӣ дар Уганда аз падар ва модари ҳиндӣ ба дунё омадааст ва агар дар интихоботи умумии моҳи ноябр ғолиб шавад, нахустин шаҳрдори мусалмон ва ҳиндутабори Ню-Йорк хоҳад шуд.

Босим Элкарра, мудири иҷроияи CAIR Action дар ин бора чунин гуфт: “Мо аз ҳамаи шахсони расмӣ, аз ҳар ҳизб даъват мекунем, ки исломситезиро бе ягон баҳона маҳкум кунанд, ҳатто агар ҳампаймонҳояшон ин таҳқирҳоро паҳн кунанд”.

Таҳлилгарон гуфтаанд, ки беш аз 62 фоизи паёмҳо бар зидди мусалмонон ва бар зидди Заҳрон Мамданӣ дар шабакаи иҷтимоии “Х” нашр шудааст. Ба гуфтаи онҳо дар миёни афроде, ки суханони зидди мусалмононро паҳн мекунанд, наздикони президент Доналд Трамп, аз ҷумла писарони ӯ низ ҳастанд.

Писари Доналд Трамп рӯзи чоршанбе дар шабакаи “Х” навишт: “Ню-Йорк суқут кардааст” ва афзуд “Ню-Йоркиҳо барои 9/11 овоз доданд”.

Худи ҳамон рӯз намояндаи ҷумҳурихоҳон Марҷори Тайлор Грин акси сохтаи ҳуши маснуъиро нашр кард, ки дар он муҷассамаи Озодӣ дар Амрико бо бурқа (ҳиҷоби исломӣ) пӯшонида шудааст.

Dialog.tj